लिबिया बाढी : मृत्युु हुनेहरुकाे सङ्ख्या ११ हजार ३ सय जना पुग्यो, अझै १० हजारभन्दा धेरै बेपत्ता

गामघर डेस्क

लिबिया ।
लिबियाको पूर्वी क्षेत्रमा आँधीपछि आएको बाढीमा ज्यान गुमानेको सङ्ख्या ११ हजार तीन सय जना पुगेको छ ।

ड्यानियल आँधीसँगै परेको मुसलधारे वर्षाले बाढी आउँदा पूर्वी सहर डेर्नाका ११ हजार तीन सय जनाले ज्यान गुमाएका लिबियाली रेडक्रसका अधिकारीलाई उद्धृत गरी अल जजिराले जनाएको छ । १० हजार एक सय मानिस हराइरहेका विवरण प्राप्त भएको पनि रेडक्रसले जनाएको छ ।

बाढीका कारण ५० हजार जनाभन्दा धेरै मानिस विस्थापित भएका छन् । गएको आइतवार दिउँसो आँधी आएसँगै मुसलधारे वर्षा हुँदा दुई वटा नदीका बाँध भत्केपछि बाढीले गाउँ–सहरका भवन र तिनमा बसेका मानिसलाई बगाएको थियो ।

९० हजार जनसङ्ख्या भएको डेर्नामा अहिले जताततै शवमात्र छरिएका उद्धारकर्ताहरूले जनाएका छन् । डेर्नाका मेयर अब्दुलमेनम अल–गैथीधचले पनि ज्यान गुमाउनेको सङ्ख्या २० हजार पुग्ने बताउनुभएको छ । सहरभन्दा ६० माइल पर पनि शव भेटिएको बीबीसीले जनाएको छ । एजेन्सी

प्रकाशित मिति: २०२३-०९-१५ , समय : २१:१०:०० , १ वर्ष अगाडि