एमाले र राप्रपाले बहिष्कार गरेपछि कोशी प्रदेशसभा बैठक अनिश्चितकालका लागि स्थगित

गामघर डेस्क

विराटनगर । प्रमुख प्रतिपक्षी दल नेकपा एमाले र राष्ट्रिय प्रजातन्त्र पार्टी (राप्रपा) ले बहिष्कार गरेपछि कोशी प्रदेशसभा बैठक अनिश्चितकालका लागि स्थगित भएको छ ।

सभाध्यक्ष इस्माइल मन्सुरीले बैठक शुरु गरेलगत्तै एमाले र राप्रपाका प्रदेशसभा सदस्य उठेका थिए । उनीहरू सभाध्यक्षविरुद्ध नाराबाजी गर्दै बैठक कक्ष छाडेर बाहिरिएपछि मन्सुरीले अर्को सूचना जारी नभएसम्मका लागि बैठक स्थगित गर्नुभएको हो ।

कोशी प्रदेशका मुख्यमन्त्री उद्धव थापाले विश्वासकाे मत लिँदा सभाध्यक्षको पनि मत प्रयोग गरेको विरोधमा प्रतिपक्षी दलहरूले प्रदेशसभा बहिष्कार गरेका हुन् ।

यसैबीच कोशी प्रदेशका मुख्यमन्त्री उद्धव थापाले लिएको विश्वासको मत असंवैधानिक भएको भन्दै नेकपा एमाले संसदीय दलका नेता हिक्मत कार्कीले आज बुधवार सर्वोच्च अदालतमा रिट दर्ता गराउनुभएको छ ।

प्रकाशित मिति: २०२३-०८-२३ , समय : १७:४९:५० , १ वर्ष अगाडि