किसानलाई रोपाइँको चटारो : तर, पानी र मल अभाव……
मिति: २०२३-०६-२८ , समय : १५:५१:१८ , गामघर डेस्क
धान राेपाइ गर्दै तराईका किसानहरु....तस्बिर : गामघर टिभिबाट
गामघर डेस्क
राजविराज । पानी पर्न थालेसँगै किसानलाई धान रोपाइँको चटारो शुरु भएको छ ।
काठमाण्डौ उपत्यकासहित पहाडी र तराईका जिल्लामा रोपाइँ भैरहेको छ । काठमाण्डौ उपत्यकासहित आसपासका क्षेत्रमा लगातारजसो पानी परेको छ ।
सुदूरपश्चिमलगायत केही जिल्लामा भने पानीको अभाव हुँदा रोपाइँमा असर परेको छ ।
रोपाइँका लागि पर्याप्त पानी नहुँदा बोरिङबाट तानेर रोपाइँ गर्न थालेको कैलाली, कञ्चनपुरलगायत जिल्लाका किसानले गुनासो गरेका छन् ।
कृषि ज्ञान केन्द्र कैलालीका प्रमुख खगेन्द्रप्रसाद शर्माका अनुसार कैलालीमा अहिलेसम्म झण्डै १२ प्रतिशतमा रोपाइँ भएको छ ।
यस्तै, रोपाइँ शुुरु भइसक्दासमेत रासायनिक मल नपाएको किसानको गुनासो छ ।
सरकारले यसपटक धान बालीमा मलको अभाव नहुने दाबी गर्दै आए पनि किसानले मकै र धानका लागि पर्याप्त मल पाएका छैनन् ।
आम्दानी गर्ने र जीविका चलाउने मुख्य बालीका रुपमा बर्खे धान बालीलाई लिइन्छ ।
मल र सिँचाइको अभावले मुख्य बालीको उत्पादनमा असर पर्न सक्ने किसानको गुनासो छ ।
उच्च पहाडका जुम्लालगायत आसपासका क्षेत्रमा मार्सी धानको रोपाइँ सकिएको छ ।
प्रकाशित मिति: २०२३-०६-२८ , समय : १५:५१:१८ , १ वर्ष अगाडि
