मधेस प्रदेश : आफ्नै फुपूको हत्या अाराेपमा एक युवक १४ वर्षपछि पक्राउ

गामघर डेस्क

जनकपुर ।
मधेस प्रदेशमा आफ्नै फुपूको हत्या गरेर फरार रहेका एकजनालाई रौतहट प्रहरीले १४ वर्षपछि पक्राउ गरेको छ ।

पक्राउ पर्नेमा रौतहटको गुजरा नगरपालिका ६ प्रतापपुर पल्टुवाका ४५ वर्षीय शेख अलाउदिन रहेका छन् ।

आफ्नै फुपूको हत्यापछि फरार अलाउदिनलाई १४ वर्षपछि ईलाका प्रहरी कार्यालय गरुडाको टोलीले शनिबार पक्राउ गरेको हो ।

२०६६ साल पुस ८ गते राति १२ बजे साविक गाविस बगही हाल कटहरीया–६ फत्तेपुरका शेख फौजदारकी श्रीमती ६५ वर्षीया मजबुनिया शेखिनको अलाउदिनले गोली हानी हत्या गरेको आरोप लागेको थियो ।
जग्गाको लोभमा हत्या गरेको आरोप लागेपछि उनी फरार थिए ।

प्रहरीले उनलाई गरुडा नगरपालिका ४ स्थित नयाँ एनपी स्टार होटल अगाडि फेला पारेको इलाका प्रहरी गरुडाले जनाएको छ ।

प्रकाशित मिति: २०२३-०५-२१ , समय : १५:५८:४५ , २ वर्ष अगाडि