बारा २ मा जसपाका यादव, एमालेका पाैडेल र रास्वपाका खरेलकाे उम्मेदवारी दर्ता

जय नारायण यादव

बारा । आउँदाे वैशाख १० गते हुने उपचुनावका लागि बारा क्षेत्र नम्बर २ बाट जनता समाजवाद पार्टी (जसपा) का अध्यक्ष उपेन्द्र यादवले उम्मेदवारी दर्ता गर्नुभएकाे छ ।

सत्तारूढ गठबन्धनका साझा उम्मेदवार यादवले आज साेमवार कलैयामा रहेकाे मुख्य निर्वाचन अधिकृतकाे कार्यालय पुगेर उम्मेदवारी दर्ता गराउनुभएकाे हाे । उम्मेदवारी दर्ता गराउँदै जसपा अध्यक्ष यादवले बारा २ का नागरिकले आफूलाई बोलाएकाले आफ्नो जित निश्चित रहेको दाबी गर्नुभयाे । यसअघि मङ्सिर ४ गते भएकाे प्रतिनिधि सभा चुनावमा यादव जनमत पार्टीका सीके राउतसँग पराजित हुनुभएकाे थियाे ।

यस्तै नेकपा एमालेका पुरुषोत्तम पौडेल, जनमत पार्टीका शिवचन्द्र कुशवाहा, राष्ट्रिय स्वतन्त्र पार्टी (रास्वपा) का रमेश खरेल, आम जनता पार्टीका अरुण ज्ञवालीले पनि उम्मेदवारी दर्ता गराउनुभएको छ ।

जसपाबाट निर्वाचित रामसहायप्रसाद यादव उपराष्ट्रपतिमा निर्वाचित भएपछि खाली रहेको यस क्षेत्रमा उपचुनाव हुन लागेको हो ।

प्रकाशित मिति: २०२३-०४-०३ , समय : १६:३४:१४ , २ वर्ष अगाडि