मिटरब्याज पीडितसँग वार्ताको तयारीमा……

गामघर डेस्क

काठमाडौं ।
न्याय नपाएसम्म नफर्कने दृढताका साथ दबाब दिन काठमाडौं आएका तराईका मिटरब्याजपीडितसँग सरकारले वार्ताको तयारी गरेको छ । उनीहरूका माग सम्बोधन लागि गृह मन्त्रालयले वार्ता गर्न लागेको हो । पीडितहरू महोत्तरीको बर्दिबासबाट हिँडेरै आइतबार काठमाडौं आइपुगेका थिए । काठमाडौंको खुलामञ्चमा धर्नामा बस्न लागेका उनीहरूलाई काठमाडौं महानगरले अवरोध गरेपछि अनामनगरस्थित तमु बौद्ध सेवा समितिको हलमा बसेका छन् । वार्ताका लागि उनीहरूले टोली गठन गर्न लागेका छन् ।

गृह मन्त्रालयका एक अधिकारीका अनुसार पीडितबाट जानकारी आएलगत्तै वार्ता हुनेछ । गृहले सहसचिव रुद्रादेवी शर्माको नेतृत्वमा वार्ता टोली गठन गरेको छ । मंगलबार मात्र सरकारले मिटरब्याजलाई अपराध मान्ने गरी कानुन बनाउने निर्णय गरिसकेको छ । यससम्बन्धी कानुनको मस्यौदा कानुन मन्त्रालयमा रहेकोमा छिटो प्रक्रिया पूरा गरी संसद्मा लैजाने तयारी छ ।

मिटरब्याजपीडितहरू आन्दोलन गर्न पटक–पटक काठमाडौं आएका छन् । आन्दोलनकै आधारमा सरकारले गत वर्ष अध्ययन कार्यदलसमेत गठन गरी प्रतिवेदन बनाएको थियो । सरकारले उजुरी माग गरेपछि त्यसउपर छानबिनमा ढिलाइ भएको र कानुन निर्माण प्रक्रिया पनि अल्झिएको भन्दै उनीहरू आन्दोलनमा उत्रिएका हुन् । गृह मन्त्रालयले छानबिनलाई तीव्रता दिन केही दिनअघि मात्र ७७ जिल्लाकै प्रशासन कार्यालयलाई परिपत्र गरेको छ । तर, पीडितहरू अझै विश्वस्त हुन सकेका छैनन् । उनीहरूलाई प्रमुख राजनीतिक दलले पनि आन्दोलनमा साथ दिएका छैनन् । नयाँ पत्रिकाबाट

प्रकाशित मिति: २०२३-०३-३० , समय : ०७:४५:३३ , 2 years अगाडि