मधेस प्रदेश : ७६ वर्षीय मानबहादुर अबैध गाँजासहित पक्राउ

गामघर डेस्क

जनकपुरधाम । मधेस प्रदेश प्रहरीले सर्लाहीको बागमती नगरपालिका–१२, बथाने टोलबाट लागुऔषध गाँजासहित ७६ वर्षीय मानबहादुर बललाई पक्राउ गरेको छ। उनलाई घरमै गाँजा लुकाएर राखी बिक्री वितरण गर्दै आएको भन्ने विशेष सूचनाको आधारमा पक्राउ गरिएको हो।इलाका प्रहरी कार्यालय कर्मैया र हरिवनको संयुक्त टोलीले प्रहरी नायब निरीक्षक (सई) सुभाष यादवको नेतृत्वमा बलको घर खानतलासी गर्दा लुकाइ राखिएको १६ किलो ५०० ग्राम गाँजा बरामद गरेको जनाएको छ।
ईलाका प्रहरी कार्यालय कर्मैयाको कमाण्ड सम्हालेदेखि सई सुभाष यादवले लागुऔषध कारोबारमा संलग्नहरूलाई कडाइका साथ निगरानी गर्दै आएका छन्। उनको नेतृत्वमा प्रहरीले लगातार लागुऔषध कारोबारीहरूलाई पक्राउ गर्दै आएको छ।बरामद गरिएको गाँजा र पक्राउ परेका बललाई थप अनुसन्धानका लागि इलाका प्रहरी कार्यालय हरिवनमा राखिएको छ। जिल्ला प्रहरी कार्यालय सर्लाहीका सूचना अधिकारी एवं प्रहरी नायब उपरीक्षक सरोज राईका अनुसार घटनाबारे विस्तृत अनुसन्धान भइरहेको छ।

प्रकाशित मिति: २०२५-०४-०३ , समय : १२:०७:४६ , 2 days अगाडि