मधेश केन्द्रित दलहरु भूमि अध्यादेशको विपक्षमा …

गामघर डेस्क

काठमाडौं । मधेश केन्द्रित आठ दलीय गठबन्धनले भूमि अध्यादेशले दूरगामी असर पर्ने बताएको छ । जनता प्रगतिशील पार्टीका अध्यक्ष हृदयेश त्रिपाठीले विज्ञप्ति निकालेर आठ दलीय गठबन्धन भूमि अध्यादेशको विपक्षमा रहेको बताएका छन् ।
‘…अध्यादेशहरू विशेषतः भूमिसम्बन्धी केही नेपाल ऐनलाई संशोधन गर्न बनेको अध्यादेश र २० % भन्दा बढी मुनाफा लिन बन्देज रहेको ऐनको प्रावधानलाई विस्थापित गरी सो प्रावधान हटाउने कार्य भएको अध्यादेशले देशव्यापी बहस तीव्र आलोचनाको केन्द्रविन्दु रहेको छ’ विज्ञप्तिमा उल्लेख छ ।विज्ञप्तिमार्फत अध्यक्ष त्रिपाठीले यी अध्यादेशहरुको व्यवस्थाप्रति जनता समाजवादी पार्टी (जसपा) नेपालले लिएको दृष्टिकोणको स्वागत गरेका छन् ।जसपा नेपालको निर्णयले सार्वजनिक जग्गा, वनक्षेत्र, बुट्यान, हाट, हाटघाट, गौचर, बजार, राष्ट्रिय निकुञ्ज वा आरक्ष, मध्यवर्ती क्षेत्रको जग्गा, चुरे क्षेत्र को संरक्षण गर्न भूमिका खेल्ने विश्वास रहेको जनाइएको छ ।
सत्तासीन जसपा नेपालको माघ २९ गते बसेको संसदीय दलको बैठकले भूमिसम्बन्धी अध्यादेश स्वीकार नगर्ने निर्णय ग¥यो । जसपाको यो निर्णयपछि कांग्रेस–एमाले नेतृत्वको गठबन्धन सरकार झस्क्यो। किनभने, जसपा नेपालले समर्थन नगरे भूमिसम्बन्धी अध्यादेश राष्ट्रियसभाबाट पारित नहुने अवस्था सिर्जना भयो। यद्यपि, जसपा नेपाल सरकारमा छैन, तर समर्थन जनाइरहेको छ। कांग्रेस र एमालेसँग प्रतिनिधिसभामा झन्डै दुईतिहाइ बहुमत छ। तर, राष्ट्रियसभामा भने दुई दल मिल्दा पनि अल्पमतमा छन्। जसपापछि सत्तासीन लोसपाले पनि भूमिसम्बन्धी अध्यादेश स्वीकार गर्न नसक्ने बतायो। लोसपा अध्यक्ष महन्थ ठाकुरले भूमिसम्बन्धी अध्यादेश स्वीकार गर्न नसकिने विज्ञप्तिमार्फत जानकारी दिए। बिहीबार सर्लाही पुगेका ठाकुरले भूमिसम्बन्धी अध्यादेशका कतिपय प्रावधान स्वीकार गर्न नसक्ने भएकाले पार्टीले समर्थन गर्न नसक्ने बताए। सरकारको निर्णयको विपक्षमा उभिनु परेकाले नैतिक संकट आइपरेको र त्यसका लागि सरकारमा रहेका श्रममन्त्री शरतसिंह भण्डारीलाई राजीनामा गर्न सुझाव पनि दिए। त्यसबेला मन्त्री भण्डारी विदेश थिए।प्रधानमन्त्री केपी ओलीले शुक्रबार र शनिबार सत्ता पक्षको बैठक बोलाए। लोसपाका अध्यक्ष ठाकुर बैठकमा पुगे। सहमतिमा अध्यादेश पारित गर्ने भन्दै प्रधानमन्त्री केपी शर्मा ओली र कांग्रेस सभापति शेरबहादुर देउवासँग बैठक गरे। लोसपाबाट प्रतिनिधि सभामा ४ र राष्ट्रियसभामा एक सांसद छन्।

प्रकाशित मिति: २०२५-०२-२३ , समय : ०८:४८:२१ , 1 month अगाडि