सप्तरीमा क्याम्पस जाँदै गरेकी १५ वर्षीया किशोरी बलात्कृत : बलात्कार गर्ने युवक पक्राउ

गामघर डेस्क

राजविराज । सप्तरीमा क्याम्पस जाँदै गरेकी १५ वर्षीया किशोरीलाई बलात्कार गरेको आरोपमा प्रहरीले एक युवकलाई पक्राउ गरेको छ।

पक्राउ पर्ने सप्तरीको विष्णुपुर गाउँपालिका वडा न. १ का १९ बर्षीय अकलेश कुमार मण्डल हुन। प्रहरीका अनुसार बुधबार घरबाट साईकलमा राजविराजस्थित क्याम्पस आउँदै गरेकी १५ वर्षीया किशोरीलाई मण्डलले बलात्कार गरेको आरोप छ।

बिहान करिव पौने ६ बजे क्याम्पस जाँदै गर्दा ती किशोरीलाई विष्णुपुर गाँउपालिका वडा न. ७ स्थित कोशी पश्चिमी नहरको दक्षिणी डिलछेउमा लगेर बलात्कार गरेको उजुरी प्रहरीमा आएको जिल्ला प्रहरी कार्यालय सप्तरीका डीएसपी एवं प्रबक्ता जितेन्द्रकुमार बस्नेतले जानकारी दिनुभयाे ।

प्रतिकार गर्ने क्रममा किशोरीको बाँया हात भाँचिएको छ। पीडित किशोरीको शरीरका विभिन्न भागमा नीलडामसमेत छ।

प्रहरीका अनुसार कक्षा ११ मा पढ्ने पीडितकै जाहेरीका आधारमा आरोपी अकलेशकुमारलाई बुधबार साँझ पक्राउ गरिएको डीएसपी वस्नेतले जानकारी दिनुभयो । यता आराेपित मण्डललाई सप्तरी जिल्ला अदालतमा उपस्थित गराई अनुशन्धानका लागि अनुमति लिईएको प्रहरीले जनाएको छ ।

प्रकाशित मिति: २०२५-०१-२३ , समय : १६:०२:३३ , ११ घन्टा अगाडि