उदयपुरमा जिप दुर्घटना हुदा चालकको मृत्यु, पाँचजना घाइते

गामघर डेस्क

उदयपुर ।
कोशी प्रदेशको उदयपुरको लिम्चुङबुङ गाउँपालिका– ३ मा जिप दुर्घटना हुँदा चालकको मृत्यु भएको छ भने पाँचजना घाइते भएका छन् । सदरमुकाम गाईघाटबाट लिम्चुङबुङतर्फ जाँदै गरेको बा.१च ३२६७ नम्बरको जिप तीनचोकेमा दुर्घटना भएको हो ।

जिल्ला प्रहरी कार्यालय उदयपुरका सूचना अधिकारी डिएसपी राजन चापागाईंका अनुसार जिप दुर्घटनामा परी मृत्यु हुने सोही जिपका चालक त्रियुगा नगरपालिका–१६ का २६ वर्षीय युवराज तामाङ रहेका छन् ।

आज सोमबार भएको जिप दुर्घटनामा परी घाइते हुनेमा लिम्चुङबुङ गाउँपालिका– ३ का १९ वर्षीया सुस्मिता खत्री, पाँच वर्षीया बालिका सुबिमा खत्री, ४१ वर्षीया नीललक्ष्मी राई, ६२ वर्षीया चरिमाया राई र लिम्चुङबुङ–४ थाप्राङका ४७ वर्षीय बलदीप राई रहेको डिएसपी चापागाईंले जानकारी दिए ।

यता घाइतेहरूको अवस्था भने सामान्य रहेको छ । दुर्घटनामा परेको जिप सडकबाट झन्डै चार सय मिटर तल खसेको उनले बताए । जिप ब्रेक फेल भएर दुर्घटनामा परेको हुन सक्ने प्रहरीको भनाइ छ ।

प्रकाशित मिति: २०२४-१२-०९ , समय : १६:००:५१ , ७ दिन अगाडि