मधेस प्रदेश : सशस्त्र प्रहरीका सईको हत्या प्रकरणमा दुई जना पक्राउ

गामघर डेस्क

सिरहा । जीपको ठक्करबाट सिरहामा सशस्त्र प्रहरीका प्रहरी नायब निरीक्षक (सई) को मृत्यु प्रकरणमा दुई जना पक्राउ परेका छन् । अनुसन्धानका क्रममा सोधपुछका लागि दुई जनालाई पक्राउ गरेकाे प्रहरीले जनाएको छ ।

उनीहरूलाई पक्राउ गरेर बयान लिने काम भइरहेको जिल्ला प्रहरी कार्यालय सिरहाका प्रमुख एवम् प्रहरी उपरीक्षक (एसपी) रमेश पण्डितले जानकारी दिनुभयो । घटनामा प्रयोग भएको गाडी र सङ्लग्न व्यक्तिको पहिचान भइसकेको पनि प्रहरी उपरीक्षक पण्डितले बताउनुभयो ।

नम्बर नखुलेको जीपको ठक्करबाट नेपाल–भारत सीमा नजिकै बरियारपट्टी गाउँपालिका–१ कचनारीको भित्री सडकमा गस्तीमा रहेका सशस्त्र प्रहरीका सई ४८ वर्षीय लक्ष्मणप्रसाद यादवको हिजो बिहान ज्यान गएको थियो ।

यसअघि अवैध जाँड–रक्सी ओसारपसार गरिरहेको गाडीलाई रोक्न खोज्दा योजनाबद्ध रूपले किचेर हत्या गरेको आरोप लगाउँदै आफन्तसहित स्थानीयवासीले पूर्व–पश्चिम सडकको लहान खण्ड अवरुद्ध गरेका थिए । रासस

प्रकाशित मिति: २०२४-१२-०३ , समय : ०७:०९:२९ , २ हप्ता अगाडि