कृषिलाई आधुनिकीकरण गर्न सप्तरीको छिन्नमस्ता गाउँपालिकाले डिजिटल एग्रीकल्चर रूम स्थापना गर्ने

गामघर डेस्क

छिन्नमस्ता । सप्तरीको छिन्नमस्ता गाउँपालिकामा ‘डिजिटल एग्रीकल्चर रूम स्थापना’ गरिने भएको छ । कृषिलाई आधुनिकीकरण गरि उत्पादन बढाउने उद्देश्यले छिन्नमस्ता गाउँपालिकाले कृषि सुचना तथा प्रशिक्षण केन्द्रको सहकार्यमा पालिकामा डिजिटल एग्रीकल्चर रूम स्थापना गर्न लागेको हो ।

कृषकहरूको समस्या समाधानको लागि डिजिटल भिलेज इन्टिएटिभ(डीभीआई) कार्यक्रम अन्तर्गत पालिकामा डिजिटल एग्रीकल्चर रुमको स्थापना गर्न लागेको पालिका अध्यक्ष विद्यानन्द चौधरीले जानकारी दिनुभयो । उहाँका अनुसार यस रूममा पालिकाको कृषि विज्ञ, पशु विज्ञ तथा कार्यक्रम विज्ञ रहेर कृषकको बालीमा आइपरेको रोग, समस्याको समाधान गर्ने बताउनुभयो । उहाँले यस कार्यक्रम अन्तर्गत किसानहरूको मोबाइल फोनमा टेली प्वाइन्ट डाक्टर नामको एप राख्ने बताउनुभयो ।

कृषकहरूको मोबाइलमा यो एप राखिनेछ, जसबाट उहाँहरूले आफ्नो बालीको फोटो खिचेर त्यसमा कुन किरा लागेको, के रोग हो थाहा पाउँछन् र त्यसको समाधान पाउँछन्, यो चौबिसै घण्टा प्रयोग गर्न सकिने अध्यक्ष चौधरीले बताउनुभयो ।

उहाँले पालिकामा कृषकहरुको सूचिकरण गरिने तथा सोलार वाटर पम्प समेत जडान गर्ने कार्यक्रम रहेको सञ्चारकर्मीलाई जानकारी दिनुभयो । त्यस्तै, पालिकाले डिजिटिल सोइल म्यापिङ्ग (कम्प्युटरमा आधारित माटो नक्साङ्कन) कार्यक्रम सुरुवात गर्न लागेको जनाएको छ । यसबाट जग्गाहरूको फोसफोरस, पोटास, नाइट्रोजन, ओरगेनिङ्ग मेटर, टेक्सटल, जमिनहरुको किसिम लगायतको विषयबस्तुको डाटा थाहा पाउने बताइएको छ ।

यस कार्यक्रम अन्तर्गत जग्गाको अवस्था, जग्गामा मल खाद्यको लागि रणनिती बनाउन मदत पुर्याउनुको साथै संतुलित मलखाद्यको प्रयोग र कृषि उत्पादन बढाउन तथा विषादीरहित उत्पादनमा महत्वपूर्ण भूमिका खेल्ने जनाएको छ ।

प्रकाशित मिति: २०२४-०४-२० , समय : १७:३३:२२ , ८ महिना अगाडि