मधेस प्रदेश : प्रहरीको सर्वाधिक खोजीमा रहेका कुख्यात अपराधी १० महिनापछि पक्राउ

गामघर डेस्क

जनकपुरधाम । मधेस प्रदेशकाे नेपाल प्रहरीको सर्वाधिक खोजीकाे सूचीमा रहेका कुख्यात अपराधी शेख नुरुल्लाह १० महिनापछि पक्राउ परेका छन्।

जिल्ला प्रहरी कार्यालय रौतहटले आइतबार पत्रकार सम्मेलन गरी रौतहट देवाही गोनाही नगरपालिका– १ घर भएका ५२ वर्षीय शेख नुरुल्लाहलाई सार्वजनिक गरेको हो।

अपराध क्षेत्रको मास्टरमाइन्डका रूपमा कुख्यात नुरुल्लाहलाई मधेस प्रदेशको रौतहटको राजदेवी नगरपालिका वडा न. ८ लक्ष्मीपुर बेलविछवा चोकनजिकैको नेपाल–भारत सीमावर्ती क्षेत्रबाट पक्राउ गरेको प्रहरीले जनाएको छ।

०८० जेठ ११ गते मध्यराति साढे १२ बजेको समयमा देवाही गोनाही नगरपालिका– १ करुनिया गाउँमा ७८ वर्षीय शेख तैयवलाई शेख नुरुल्लाहको आदेशमा सोही स्थानका शेख शेराज, शेख सद्दाम भन्ने खलिउल्लाह र भारतीय नागरिक राकेशकुमारले गोली हानी हत्या गरेका प्रहरीको भनाइ छ।

शेख शेराज र भारतीय नागरिक राकेश कुमारलाई पक्राउ गरी कर्तव्य ज्यान मुद्दामा पुर्पक्षका लागि कारागारमा छन् भने मुख्य योजनाकार नुरुल्लाह र उनका भाइ खलिउल्लाह फरार रहँदै आएका थिए।

वृद्ध तैयवको हत्या गराउने मुख्य योजनाकार शेख नुरुल्लाह र खलिउल्लाविरुद्ध गत पुस १६ गते जिल्ला अदालत रौतहटले ज्यान कसुरमा पक्राउ पुर्जी जारी गरेको थियो। गोप्य सूचनाका आधारमा प्रहरीले सीमावर्ती क्षेत्रहरूमा विशेष निगरानी बढाएको र सोही क्रममा आइतबार बिहान नुरुल्लाहलाई पक्राउ गर्न सफल भएको प्रहरीले बताएकाे छ।

माधवनारायण नगरपालिका– २ खेसरहिया बजारस्थित हनुमान मन्दिरका ६५ वर्षीय पुजारी श्रीराम साहको हत्यामा समेत उनी मुछिएका छन्। ०७७ साल भदौ ३ गते राति ९ बजेतिर पुजारी साह मन्दिरपरिसरमा खाना खाँदै गरेको अवस्थामा नुरुल्लाहले देव्रे कन्चटमा गोली हानी हत्या गरेको प्रहरीको दाबी छ। नयाँ पत्रिका

प्रकाशित मिति: २०२४-०४-१४ , समय : २२:३८:०८ , ९ महिना अगाडि