सप्तरीमा शिक्षा क्षेत्रका निति, योजना, बजेट तथा छलफल र राय सुझाव संकलन

गामघर डेस्क

राजविराज । शिक्षा विज्ञान तथा प्रविधि मन्त्रालय काठमाण्डौले यहाँ शिक्षा क्षेत्रका निति, योजना, बजेट तथा छलफल र राय सुझाव संकलन सम्बन्धि कार्यक्रम सम्पन्न भएको छ ।
सप्तरीका १८ वटै पालिकाका शिक्षा संयोजक तथा स्थानिय केही सञ्चारकर्मीहरुसंग अन्तरक्रिया गरी सुझाव संकलन गरेको हो ।
सो राय सुझाव संकलन कार्यक्रममा सहभागीहरुले नयाँ संघीय शिक्षा ऐन जारी भए पछि यस क्षेत्रमा देखिएका समस्याहरुलाई समाधान गर्नुपर्नेमा सहभागीहरुले जोड दिएका थिए ।
सहभागीहरुले शिक्षामा कूल बजेटको २० प्रतिशत बजेट लगानी गर्नुपर्नेमा तिनै तहका सरकारले बजेट कटौती गरेकोमा सरकारले बजेट थप्नु पर्ने विचार राखेका थिए ।
कार्यक्रममा मन्त्रालयका उपसचिव प्रकाश सापकोटाले सरकारको निती योजना तथा बजेटमा शिक्षा क्षेत्रमा देखिएका समस्या र समावेश गरिनु पर्ने विषयबारे नयाँ किसिमबाट अगाडी बढ्ने उदेश्यले सुझाव संकलन शुरु गरिएको बताउनु भयो ।
उहाँले सुझाव संकलन कार्य सात वटै प्रदेशमा संचालन हुने बताउनुहुदै शुरुवात मधेश प्रदेशको सप्तरीबाट गरेको बताउनु भयो । उहाँले सुझाव संकलन पश्चात मन्त्रालय मार्फत सरकार समक्ष प्रतिवेदन प्रस्तुत गरिने लक्ष्य रहेको बताउनु भयो ।
उपसचिव सापकोटाले मुलुकमा शिक्षा विकासको मुख्य पुर्वाधार भएर पनि यसलाई उत्पादन र रोजगारी संग जोड्न नसक्दा अपेक्षा अनुसारको परिणाम आउन नसकेको बताउनु भयो ।
सो कार्यक्रममा मन्त्रालयका शाखा अधिकृत शिवराज पोखरेल, शिक्षा विकास समन्वय इकाई सप्तरीका प्रमुख विजय कुमार मण्डल, पत्रकार महास संघ सप्तरीका अध्यक्ष श्रवण कुमार देव,लगायतका सहभागीहरुले विद्यालयको शैक्षिक अवस्थालाई गुणस्तरीय र विश्वसनीय बनाउन आ–आफ्नो सुझाव मन्तब्य दिएका थिए ।

प्रकाशित मिति: २०२४-०२-०९ , समय : २०:५६:०७ , 1 year अगाडि