मधेश प्रदेश : दासकाे हत्या आरोपमा ससुरा पक्राउ

गामघर डेस्क

सिरहा ।
मधेस प्रदेश अन्तरगत सिरहा प्रहरीले बुहारीको हत्या आरोपमा ससुरालाई पक्राउ गरेको छ ।

पक्राउ पर्नेमा सिरहाको कल्याणपुर नगरपालिका ८ बडकी मझाउ टोलका ५१ वर्षीया रामअशिष दास रहेको जिल्ला प्रहरी कार्यालय सिरहाले जनाएको छ । मंगलबार साँझ लुकीछिपी बसि रहेको अवस्थामा दासलाई पक्राउ गरिएको हो ।

गत कार्तिक २७ गते साँझको समयमा कल्याणपुर ८ बड्की मझाउ स्थितमा बस्ने राजकिशोर दासको श्रीमती २७ वर्षीया संगिता कुमारी दासलाई घरायसी बादबिवादका कारण उनका ससुरा दासले छोरा मेला हेर्न गएको अवस्थामा संगितालाई धारिलो हतियार बन्चरोले टाउकोमा प्रहार गर्दा घटना स्थलमै उनको मृत्यु भएको थियो ।

यता साे घटना पश्चात दास फरार रहेका थिए ।

यस सम्बन्धमा थप अनुसन्धान भइरहेको जिल्ला प्रहरी कार्यालय सिरहाले जनाएको छ ।

प्रकाशित मिति: २०२३-११-२९ , समय : १४:५४:२१ , 1 year अगाडि