अशान्त बन्दै काठमाडौं : एकैपरिवारका तीनसहित चार जनाको शव फेला, हत्या गरेको आशङ्कामा अनुसन्धान चल्दै

शुभ नारायण यादब

काठमाण्डौ । पछिल्लोपटक नेपालकाे राजधानी काठमाडौं पनि अशान्त बन्नुका साथै काठमाडौंबासिहरु शान्तिपूर्ण तरिकाबाट जिउन नसकिने अवस्था रहेको छ । साेहि क्रममा काठमाण्डौको तीनकुने गैह्रीगाउँमा चार जनाको शव अाज बिहान फेला परेको छ । दिव्य फर्निचर मिलभित्र एकै परिवारका तीनसहित चार जनाको शव भेटिएको हो ।

काठमाण्डौ उपत्यका प्रहरी कार्यालयका प्रवक्ता, प्रहरी वरिष्ठ उपरीक्षक दिनेशराज मैनालीका अनुसार धारिलो हतियार प्रहार गरी हत्या गरिएको अवस्थामा चार वटा शव फेला परेको हो ।

हत्या हुनेमा दुई महिला र दुई पुरुष रहेका छन् । दोलखा घर भएका कुमार भुजेल, उहाँकी श्रीमती अम्बिका र कुमारकी आमा शुभद्रा भुजेल तथा मोरङ घर भएका नवीन राईको शव भेटिएको प्रहरीले जनाएको छ ।

अहिले घटनास्थलमा प्रहरी परिचालन गरी थप अनुसन्धान भइरहेको पनि उपत्यका प्रहरी कार्यालयका प्रवक्ता, प्रहरी वरिष्ठ उपरीक्षक मैनालीले जानकारी दिनुभयो । मैनालीका अनुसार घटनाकाे अनुसन्धानका लागि काठमाण्डाैकाे तीनकुने बस्ने २८ वर्षीय दीपेन्द्र राईलाई साेधपुछका लागि पक्राउ गरिएकाे छ ।

घटनाको अनुसन्धानका लागि तालिमप्राप्त प्रहरी र कुकुरको समेत परिचालन गरिएको छ । घटना राति १२ बजेतिर भएको हुन सक्ने अनुमान गरिएको छ ।

प्रकाशित मिति: २०२३-०९-१६ , समय : ०७:५८:२२ , १ वर्ष अगाडि