कोशी प्रदेशका मुख्यमन्त्रीले विश्वासको मत लिँदै, आफूलाई मत नदिए मध्यावधि चुनाव हुने चेतावनी
मिति: २०२३-०६-२९ , समय : १७:२३:३९ , गामघर डेस्क
तस्बिर : सामाजिक सन्जालबाट
गामघर डेस्क
विराटनगर । कोशी प्रदेशका मुख्यमन्त्री हिक्मत कार्कीले विश्वासको मत लिँदै हुनुहुन्छ । विश्वासको मत लिने प्रयोजनका लागि अहिले प्रदेशसभा बैठक चलिरहेको छ ।
प्रदेशसभा बैठकमा विश्वासको मत माग्दै मुख्यमन्त्री कार्कीले आफूलाई मत नदिएमा प्रदेश मध्यावधि चुनावमा जाने र त्यो चुनावलाई नागरिकले स्वीकार गर्लान् कि नगर्लान् भनेर प्रश्न सोध्नुभएको छ । उहाँले आफूलाई मत नदिएमा कुनै पनि राजनीतिक अङ्क गणितले सरकार बन्न नसक्ने भन्दै प्रदेशलाई मध्यावधि चुनावमा जान रोक्न सबैले सहयोग गर्नुपर्ने बताउनुभयो ।
कोशी प्रदेशमा बहुमतका लागि ४७ जना सांसद आवश्यक रहेकोमा मुख्यमन्त्री कार्कीको पक्षमा एमाले र राप्रपाका ४६ जना सांसद छन् । एक सिट रहेको जसपालाई फकाउन एमालेले निकै दौडधुप गरिरहेको छ । तर जसपाले तटस्थ बस्ने निर्णय गरिसकेको छ । यस्तै विपक्षी दलसँग पनि सभामुखबाहेक जम्मा ४५ सिट रहेको छ ।
कोशी प्रदेशसभामा एमालेका ४०, नेपाली कांग्रेसका २९, नेकपा माओवादीका (सभामुखसहित) १३, राष्ट्रिय प्रजातन्त्र पार्टीका छ, नेकपा एकीकृत समाजवादीका चार र जसपाका एक जना सांसद छन् ।
नेकपा माओवादी केन्द्रले सरकारलाई दिएको समर्थन फिर्ता लिएपछि अल्पमतमा परेका मुख्यमन्त्री कार्कीले आज बिहीवार विश्वासको मत लिन लाग्नुभएको हो । उज्यालो
प्रकाशित मिति: २०२३-०६-२९ , समय : १७:२३:३९ , २ वर्ष अगाडि
