सप्तरीमा प्रेमिकाकाे पर पुरुषसँग सम्बन्ध रहेको भन्दै साेनिताकाे प्रेमीबाटै हत्या

गामघर डेस्क

राजविराज ।
सप्तरीमा लिभिङ टुगेदर सम्बन्धमा बसेका पुरुषबाटै महिलाको हत्या गरिएको खुलासा भएको छ । सप्तरीको बलान बिहुल गाउँपालिका वडा न. ५ घर भई राजविराज नगरपालिका वडा न. ४ बजरंग चौकमा भाडा लिएर बस्दै आएकी ४१ वर्षीया सोनिता देवी यादवको हत्या भएको हो ।
श्रीमान्को मृत्युुपश्चात् अन्य पुरुषसँग लिभिङ टुगेदर सम्बन्धमा बस्दै आएकी सोनिताको हत्या आरोपमा प्रेमी राजविराज नगरपालिका ६ पुर्णीपोखरी टोल बस्ने ४२ वर्षीय शंकर शर्मा पक्राउ परेका छन् ।

जिल्ला प्रहरी कार्यालय सप्तरीका प्रहरी प्रवक्ता एव डिएसपी नरेश सिंहका अनुसार मृतक र आरोपित दुबैजना लिभिङ टुगेदर सम्बन्धमा थिए ।
शर्माले सोनिताको अरु व्यक्तिसँग सम्बन्ध रहेको आशंकामा हत्या गरेको प्रहरी अनुसन्धानबाट खुलेको छ ।

प्रहरीका अनुसार घटनाको दिन बैशाख २३ गते साँझ शर्मा सोनिता बस्दै आएको भाडाको घरमा गएका थिए। सोनिताको अन्य व्यक्तिसँग सम्बन्ध रहेको शंका शर्मालाई रहेकोमा सोही दिन दिउसो सोनिताले राजविराज वजारमा कोही केटासग गफ गरीरहेको देखेका थिए ।
दुबैजना बिच विवाद हुँदा हल्ला भएको सुनेर घरधनी शान्ति साह उनीहरुको कोठामा आउँदा लेनदेनको विषयको विवाद रहेको भन्दै घरधनीलाई पठाएका थिए ।

पुनः राती करीव १०र११ बजेको समयमा सोनिताको लागी धेरै रकम खर्च गरेको, अहिले आएर उनी अरु कोहीसंग लागेको, आफुसंग टाढा हुदै गएको जस्तो महसुस भएपछी पुनः दुबैजना बिचमा विवाद सुरु भएको थियो। विवादकै क्रममा शर्माले राती २र३ बजे तिर, मेरो पैसा, जिन्दगी सवै वर्वाद पारीस भन्दा सोनिताले आफ्नो सलले आफैले घाटीमा वेरी म मरीदिन्छु भनी धम्काउन थालेको प्रहरीको अनुसन्धानबाट खुलेको हो ।

त किन मर्छेस, मै मारी दिन्छु भनी सोनितालाई शर्माले धकेलेपछि सोनिता खाटको किनारामा ठोकिएर अनुहारमा चोट लागगेपछी शर्माले उठाएर खाटमा राखी घाटीमा बेरिएको सललाई जोडले कसेर हत्या गरेका थिए ।

करिब १० मिनेटपछि सोनिताको मृत्युु भएपछि सोनिताले कानमा लगाएको मुन्द्रा र मोवाइल लिएर फरार भएका थिए ।
घटनाको अर्को दिन दिउँसो शर्मा नेपालको सिमाना नजिकको भारतीय भूमी अन्डामड एरियामा गएर मृतकको मोवाइल प्रयोग गरी राजविराज नगरपालिका वडा न.– ६ बस्ने दिदिलाई घटनाको वारेमा वताई गएर हेर्न अह्राएका थिए। तर गएर हेर्न अस्वीकार गरेको प्रवक्ता सिंहले बताए ।
अनुसन्धानको क्रममा शर्मालाई बैशाख २६ गते तिलाठी कोईलाडी – १ को एरियामा लुकीछिपी भाग्दै गरेको अबस्थामा पक्राउ गरिएको हो ।

प्रहरीले शर्माको साथबाट मृतकको मोवाइल र कानमा लगाउने सुनको जस्तो देखिने मुन्द्रा समेत वरामद गरेको छ। यस सम्बन्धमा थप अनुसन्धान भइरहेको जिल्ला प्रहरी कार्यालय सप्तरीले जनाएको छ ।

प्रकाशित मिति: २०२३-०५-३० , समय : ०९:४३:५४ , २ वर्ष अगाडि