रासायनिक मलमा ३० अर्ब रुपैयाँ अनुदान , वन र वातावरण क्षेत्रमा १५ अर्ब ५६ करोड बजेट

गामघर डेस्क

काठमाडौं ।
सरकारले आगामी आर्थिक वर्ष ०८०/८१ मा रासायनिक मल खरिदका लागि ३० अर्ब रुपैयाँ अनुदान प्रवाह गर्ने भएको छ।
अर्थमन्त्री डा. प्रकाशशरण महतले संयुक्त सदनमा पेस गरेको बजेटमा सो कुरा जानकारी दिएका हुन्। त्यस्तै, रासायनिक मल कारखाना स्थापनाका लागि आवश्यक अध्ययन गर्ने पनि अर्थमन्त्री महतले जानकारी दिएका छन्।

यसेबिच सरकारले वन तथा वातावरण क्षेत्रमा १५ अर्ब ५६ करोड रुपैयाँ बजेट विनियोजन गरेको छ। अर्थमन्त्री डा. प्रकाशशरण महतले वन, जैविक विविधता र जलाधार व्यवस्थापनमार्फत वातावरणीय सन्तुलन कायम गरिने बताएका छन्।

वन सम्पदाको दिगो उपयोग र वनजन्य उद्यम विकास गर्दै राष्ट्रिय अर्थतन्त्रमा यसको योगदान बढाइने उनले बताए। संरक्षित क्षेत्र र सामुदायिक वनलाई पर्यापर्यटकीय गन्तव्यको रूपमा विकास गरिने उल्लेख छ।

राष्ट्रपति चुरे संरक्षण कार्यक्रममार्फत संघ, प्रदेश र स्थानीय तहको सहभागितामा चुरे संरक्षणको गुरुयोजना कार्यान्वयन गरिने महतले बताए। यसअन्तर्गत जल र जमिन संरक्षण गर्न बाँस रोपण, रिचार्ज पोखरी, गल्छी, पहिरो नियन्त्रणलगायतका कार्यक्रम सञ्चालन गरिने उल्लेख छ।

प्रकाशित मिति: २०२३-०५-२९ , समय : १८:०७:१६ , २ वर्ष अगाडि