सप्तरीको तिलाठी काेईलाडी गाउँपालिकामा बजेट सिध्याउने काम मात्र …

श्रवण वत्स

राजविराज ।
सप्तरीको तिलाठी कोईलाडी गाउँपालिकाका खेलकुद व्यवस्थापन समितिले गाउँपालिका भित्र रहेका खेलाडीहरुको मनोवल घटाउने काम गरिरहेको छ ।

पालिकास्तरीय खेलहरुमा समेत गाउँपालिका भित्र रहेको खेलाडीहरुलाई अवसरै नदिई अर्को पालिकाका खेलाडीहरुलाई भाडामा ल्याई खेलाउने काम गरिरहेको छ ।
छनौट गरेको प्रक्रियासमेत पारदर्शी नगरि मनोमानी ढंगले गाउँपालिकाको बजेट अन्तै खर्च गरिरहेको स्थानीयको आरोप छ । हनुमाननगर कंकालिनी नगरपालिकाले आयोजना गरेको प्रथम टी–२० मेयर कप क्रिकेट प्रतियोगितामा तिलाठी कोइलाडी गाउँपालिकाले वडा नम्बर १, २, ६, ७ र ८ का खेलाडीहरुलाई जानकारी समेत नगराई भाडाका खेलाडीहरुलाई सहभागि गराएका देखा परेका छन् । यस्तोमा गाउँपालिका भित्र रहेको क्रिकेट खेलाडीहरुको मनोबल निश्चित रुपमा घटने खेलको जानकार बताउँछन् ।

‘बजेट सिध्याउने र त्यसबाट कमाउने नियत मात्र हो’, स्थानीय एक जना खेलाडीले भने ‘गाउँपालिका भित्रको युवाहरुको बजेट अन्तै गइरहेको छ, मनोमानी गरिरहेछन्, कोही हेर्ने छैन्, ।’

पुर्वाञ्चलस्तरीय खेल समेत खेलिसकेका तिलाठी कोईलाडी गाउँपालिका–१, तिलाठीका मिथुन यादवले गाउँपालिकाद्वारा स्थानीय युवा खेलाडीको मनोबल घटाउने काम भइरहेको बताएका छन् ।
‘हालै गाउँपालिकाको आयोजनामा सम्पन्न भएको वडा स्तरीय खेलमा म‌ैले पनि राम्रो प्रदर्शन गरेको थिएँ ।’ उनले भने ‘तर यो मेयर कपमा तिलाठीको टिम कसरी गठन भयो केही थाहै भएन् ।’

‘गाउँपालिका भित्रको उत्कृष्टलाई नै छान्ने हो भने हालै सम्पन्न वडा स्तरीय खेलमा म्यान अफ दि सिरिज भएको खेलाडीलाई कसरी किनारा गर्न सकिन्छ ?,’ एक जना स्थानीय खेलाडीले भने ‘तर म्यान अफ दि सिरिज भएको तिलाठीको शिवको त नाम नै छैन् यस गाउँपालिका टिमको लिस्टमा ।’
वडा स्तरीय खेलको सिरिजमा शिवले सर्वोत्कृष्ट प्रदर्शन गर्दै ६ विकेट लिएका थिए भने १०३ रन बनाएका थिए ।
यस टिम छनौटको सन्दर्भमा गाउँपालिकाका खेलकुद व्यवस्थापन समितिको संयोजक ज्ञानेश्वर कुमार यादवसँग सम्पर्क गर्न खोज्दा उनले एक पटक फोन उठाए पनि परिचय गरेसँगै काटे । त्यसपछि पटकपटक फोन गर्दा रिंग गएपनि उनको फोन उठेन् ।

प्रकाशित मिति: २०२३-०४-२८ , समय : १६:२८:१६ , २ वर्ष अगाडि