हात्तीमा सवार भएर मधेशका मुख्यमन्त्री यादव विजयी जुलुसमा

गामघर डेस्क

जनकपुरधाम ।‘देखा है पहली वार मुख्यमन्त्रीको हात्ती पे सवार’ बारा २ मा यस्तै गित गुञ्जि रहेको छ । किनकी मधेश प्रदेशका मुख्यमन्त्री सरोज कुमार यादव पार्टी अध्यक्ष उपेन्द्र यादवको विजयी जुलुसमा हातीमै सवार भएर सडकमा निस्केको तस्वीर अहिले चर्चामा छ ।

प्रतिनिधिसभा सदस्यका लागि बारा २ मा भएको उपनिर्वाचनमा जनता समाजवादी पार्टी (जसपा) अध्यक्ष उपेन्द्र यादव विजयी भएपछि हात्ती सहितको जुलुस निकालिएको छ ।

बारा क्षेत्र नम्बर २ मा जसपाका नेता, कार्यकर्ता, समर्थक र मधेसका मुख्यमन्त्री सरोजकुमार यादव र अन्य मन्त्रीहरुसमेत विजयी जुलुसमा सहभागी भएका थिए । उक्त जुलुसमा मुख्यमन्त्री यादव हात्तीमा सवार थिए ।

जुलुसमा प्रयोग भएको हात्ती कहाँबाट ल्याइएको हो केही खुलेको छैन । यादवको जीत ऐतिहासिक भएको भन्दै विजयी जुलुस भव्य बनाउन हात्तीसमेत प्रयोग गराएको बताइएको छ । हात्तीमा हार्दिक बधाई लेखिएको ब्यानरसमेत राखिएको छ ।

जनमत पार्टीका शिवचन्द्र कुशवाहालाई पराजित गर्दै सो क्षेत्रबाट यादव विजयी भए । यादवलाई नेपाली कांग्रेस, नेकपा माओवादी केन्द्र, नेकपा एस र लोसपाको समर्थन थियो ।

प्रकाशित मिति: २०२३-०४-२६ , समय : १८:२९:५९ , २ वर्ष अगाडि