आज रामनवमी : देशभर श्रद्धा र भक्तिसहित मनाइँदै, राम मन्दिरहरूमा विशेष पूजाआजा , सार्वजनिक बिदा

रबि शर्मा

राजविराज । चैत्र शुक्ल नवमीका दिन सनातन धर्मावलम्बीहरूद्वारा मनाइने रामनवमी पर्व आज देशभर श्रद्धा, भक्ति र आस्थापूर्वक मनाइँदैछ। त्रेतायुगमा भगवान् विष्णुले राजा दशरथ र रानी कौशल्याको सुपुत्रका रूपमा अयोध्यामा श्रीरामको रूपमा अवतार लिएको धार्मिक विश्वासका आधारमा आजको दिनलाई विशेष मानिन्छ।
रामनवमीका अवसरमा देशभरका राम मन्दिरहरूमा पूजाआजा, भजनकीर्तन, रामायण पाठ तथा विभिन्न धार्मिक अनुष्ठानहरू भइरहेका छन्। श्रद्धालुहरू पवित्र नदी, ताल, तथा कुण्डहरूमा स्नान गरी व्रत बसी रामगीता, वाल्मीकीय, तुलसीकृत तथा भानुभक्तीय रामायणको वाचन गर्दै भक्तिभावमा लीन छन्।
धार्मिक ग्रन्थ ‘व्रतार्क’ अनुसार आज व्रत बसेर श्रीरामको पूजापाठ, जपध्यान गर्नाले मनोकामना पूरा हुने र अर्को जन्ममा बैकुण्ठ वास प्राप्त हुने विश्वास गरिन्छ।
रामनवमीको अवसरमा सरकारले देशभर सार्वजनिक बिदा दिएको छ। गृह मन्त्रालयद्वारा जारी सूचनामा सरकारी तथा सार्वजनिक कार्यालयहरूमा बिदा दिने निर्णय गरिएको उल्लेख छ।
यसैबीच, सप्तरीको हनुमाननगरस्थित ऐतिहासिक राम मन्दिरमा विशेष धार्मिक कार्यक्रमहरू आयोजना गरिएको छ। मन्दिर परिसरमा अष्टजाम कीर्तन, नगर शान्ति तथा विश्व शान्तिका लागि ४८ घण्टे रामायण पाठ सञ्चालनमा छ। टाढाटाढाबाट आएका भक्तजनहरूले पूजा–आराधना र दर्शन गरिरहेका छन्।
रामनवमी पर्वले धर्म, सत्य, कर्तव्य र मर्यादाको मार्गमा अग्रसर गराउने प्रेरणा दिने विश्वास गरिन्छ। यस्तै आज रामनवमी पर्व मनाईंदैछ । हिन्दू धर्मावलम्बीले श्रद्धापूर्वक भगवान् रामको पूजा गरेर यो पर्व मनाउने गर्छन् । हरेक वर्षको चैत शुक्ल नवमीमा पर्ने यस पर्वमा मर्यादा पुरुषोत्तम भगवान् रामचन्द्रको स्मरण गरिन्छ । त्रेतायुगमा आजकै दिन अयोध्यामा श्रीरामको जन्म भएको पौराणिक ग्रन्थमा उल्लेख छ ।

धर्मशास्त्रविद् एवम् नेपाल पञ्चाङ्ग निर्णायक विकास समितिका अध्यक्ष प्राध्यापक डा. रामचन्द्र गौतम रामनवमी पर्वको महत्व रामजस्तै मर्यादित, अनुशासित र राज्य सञ्चालकको कौशलतासँग जोडिएको बताउनुहुन्छ । रामनवमीमा नदी, ताल, कुण्डमा स्नान गरी व्रत बसेर रामगीता पाठ गर्ने परम्परा छ । चैत र असोजको नवरात्रलाई जाग्रत दसैँका रूपमा महत्वका साथ मनाइन्छ भने पुस र असारको नवरात्रलाई सुप्त दशैं भनिन्छ ।

मिथिला क्षेत्रमा रामनवमीको अझै बढी महत्व रहेको छ । जनकपुरधाममा रहेको रामजानकी मन्दिरमा भक्तजनको घुइँचो छ । आज जानकी मन्दिर परिसरमा मेला पनि लाग्छ । यो मेलामा भारतबाट समेत हजारौँ श्रद्धालु भक्तजन सहभागी भई गङ्गासागरमा स्नान गरी रामजानकी मन्दिरमा पूजा गर्छन् । रामनवमीको अवसरमा सरकारले आज सार्वजनिक बिदा दिएको छ ।

प्रकाशित मिति: २०२५-०४-०६ , समय : ०७:५७:५० , 20 hours अगाडि