सप्तरीमा भव्य रूपमा मनाइँदै चैती छठ : आज साँझ अस्ताउँदो सूर्यलाई अर्घ अर्पण

रबि शर्मा

हनुमाननगर । श्रद्धा, भक्ति र धार्मिक सहिष्णुताको प्रतीकका रूपमा रहेको चैती छठ पर्व सप्तरी जिल्लामा विशेष उत्साहका साथ मनाइँदैछ। विशेषगरी सप्तरीको सदरमुकाम राजविराज सहित हनुमाननगर लगायतका क्षेत्रमा व्रतालुहरूको सक्रिय सहभागितासहित यस पर्वलाई भव्य रूपमा सम्पन्न गरिँदैछ।

यस वर्ष विगतभन्दा बढी व्रतालुहरूले छठ पर्वमा सहभागिता जनाएका छन्। कात्तिक महिनामा मनाइने छठ पर्व जस्तै चैती छठ पनि उत्तिकै महत्त्वका साथ मनाइने परम्परा स्थापित हुँदै गएको छ।

छठ पर्वको पहिलो दिन व्रतालुहरूले नुहाइ-धुवाइ गरी चोखो भोजन ग्रहण गरे। दोस्रो दिन, अर्थात आज, साँझ अस्ताउँदो सूर्यलाई अर्घ अर्पण गरिएको छ। व्रतालुहरूले सख्खर हालेको खिर, पुरी, केरा लगायतका प्रसाद चढाई पूजा गरेका छन्।

पर्वको अन्तिम दिन भोलि बिहान उदाउँदो सूर्यलाई अर्घ अर्पण गरेपछि व्रत समापन हुनेछ। छठ पर्वका लागि विशेष प्रसादका रूपमा केरा, सुन्तला, नरिवल, अदुवा, गहुँको पिठोबाट बनाइएको ठकुवा, उखु आदिको प्रयोग गरिएको छ। साथै, बासको छिटा, दौरा, सुप, माटोबाट निर्मित हात्ती, ढकना, दियो, कलश लगायतका सामग्रीहरू अनिवार्य रूपमा पूजामा समावेश गरिएको छ। यी वस्तुहरू शुद्धताको प्रतीक मानिन्छन्।

छठ पर्व वर्षमा दुई पटक—कात्तिक र चैत महिनामा—मनाइन्छ। धार्मिक मान्यता अनुसार, यस पर्वको आराधनाले घरमा सुख-शान्ति ल्याउने, चर्मरोग निको पार्ने तथा आपसी सद्भाव र प्रेम बढाउने विश्वास गरिएको छ। हनुमान मन्दिरका पण्डित गोविन्द्र मिश्रका अनुसार सूर्यदेवको पूजा मार्फत परिवारमा सकारात्मक ऊर्जा प्रवाहित हुने मान्यता रहेको छ।

प्रकाशित मिति: २०२५-०४-०३ , समय : २०:०८:३३ , 1 day अगाडि