सप्तरी सहित मधेश प्रदेशका जिल्लाहरुमा वासन्ती छठ पर्वको रौनकता

गामघर डेस्क

राजविराज । सप्तरी सहित मधेश प्रदेशका जिल्लाहरूमा अहिले वासन्ती छठ पर्वको रौनक छ । बोलीचालीमा चैती छठ भनिने यो पर्वको तेस्रो र मुख्य दिन व्रतालुले आज षष्ठी तिथिका दिन निराहार व्रत शुरू गरेका छन् ।

पञ्चमीका दिन हिजो मध्यरातअघि खरना विधि गरेर सख्खरको खीर प्रसादस्वरुप खाएपछि निराहार व्रत शुरू भएको छ ।

आज साँझ नै व्रतालुले पवित्र जलाशयमा सजाइएको घाटमा मिष्टान्न परिकार राखिएका डालीहरू हातमा उठाएर अस्ताउँदो सूर्यलाई पहिलो अर्घ्य दिनेछन् । यो विधिलाई मिथिलाको बोलीचालीमा ‘सझुका अरख’ वा ‘सझियाघाट’ भन्ने गरिन्छ । श्रद्धा, निष्ठा र समर्पणको प्रतीक मानिने छठ पर्वको अवसरमा मिथिलाका गाउँबस्ती भक्तिमय बनेका छन् ।

जलाशयमा बनाइएका घाटहरू मनमोहक देखिएका छन् । व्रतालुले भोलि शुक्रवार सप्तमी तिथिका दिन बिहान उदाउँदो सूर्यलाई अर्घ्य दिएपछि यसपालिको वासन्ती छठ पर्व विधिवत् समापन हुनेछ ।

यसअघि अस्ति मङ्गलवार चौथी तिथिका दिन ‘नहाय–खाय’ विधिबाट पर्व शुरू गरेका व्रतालुले पञ्चमी तिथिका दिन हिजो राति नुन नहालेर एकछाक मात्र खाएर ‘खरना’ विधि सम्पन्न गरिसकेका छन् ।

मधेशको प्राचीन मिथिला क्षेत्रमा वर्षको दुईपटक छठ मनाइन्छ । कात्तिक शुक्लपक्ष चौथीदेखि सप्तमीसम्म मनाइने छठलाई शारदीय भनिन्छ । यसैगरी, चैत शुक्ल चौथीदेखि सप्तमीसम्म मनाइने छठलाई वासन्ती वा चैती छठ भनिन्छ । दुवै छठमा सूर्यदेव र षष्ठीदेवी अर्थात छठीदेवीको उपासना गरिन्छ ।

प्रकाशित मिति: २०२५-०४-०३ , समय : १२:१६:१४ , 20 hours अगाडि