भारतीय नागरिकलाइ नक्कली नागरिकता बनाउने नक्कली बुवा पक्राउ

गामघर डेस्क

सिरहा । नक्कली आमा–बुबा खडा गरेर एक भारतीय नागरिकले जिल्ला प्रशासन कार्यालय सिरहाबाट नेपाली नागरिकता लिएको खुलेको छ । भारतीय नागरिक मुस्ताक मियाँलाई नेपाली नागरिकता दिलाउन सनाखत बस्ने नक्कली बुवालाई प्रहरीले पक्राउ गरेको छ । सिराहाको नरहा गाउँपालिका–३ का वडाध्यक्ष रुस्तम अन्सारीको सिफारिसमा भारतीय नागरिक मुस्ताक मियाँलाई नेपाली नागरिकता दिलाउन सनाखत बस्ने अमानत मिया रहेका छन्

भारत बिहार मधुवनी देउधाका मुस्ताकले २०८० असारमा नागरिकता प्राप्त गरेका थिए । सिरहा नरहा वडा नम्बर ३ मा बस्ने अमानत मियाँ र रजिना खातुन दुई जनाले नक्कली आमाबुवा बनेर मुस्ताकलाई वडा अध्यक्ष रुस्तम अन्सारीको रोहवरमा फारम सिफारिस बनाइ नागरिकता दिलाइएको खुलेको थियो । नरहाका एक स्थानीयले अमानत मियाँलाई पक्राउ गरी प्रहरीले लगेको बताए । यसैगरी वडाध्यक्ष अन्सारीको पनि प्रहरीले खोजी गरिरहेको छ ।भारतीय नागरिक मियाँले वडा अध्यक्ष अन्सारीलाई एक लाख भारु दिएर नागरिकताका लागि सिफारिस गराएको आरोप छ । यो विषय केही अघि जसपा नेपालका उपाध्यक्ष राज किशोर यादवले समेत संसदमा उठाएका थिए ।पछि जसपा नेपालका नेता विजय यादवको नेतृत्वमा सिराहाका सिडिओ बासुदेव दाहाललाई ज्ञापनपत्र बुझाएर वडाध्यक्षसहितलाई कारबाहीको माग भएको थियो ।
भारत विहार राज्यको मधुवनी जिल्ला जयनगर ग्रामपञ्चायत देउधा टोलका मुस्ताक मियाँले नागरिकता बनाएका हुन् । ठेगानामा नरहा गाउँपालिका–३ सिरहा उल्लेख गरी उनले ०८० असार २६ मा नागरिकता लिएको पाइएको छ । उनको जन्ममिति २०५५ साउन १५ र नागरिकता नम्बर १५०१८०/४३६२ छ । नागरिकतामा बुवा अमानत मियाँ र आमा रजिना खातुनलाई कायम गरिएको छ । अमानत र रजिना श्रीमान–श्रीमती छन् । तर, मोसताक उनीहरूको छोरा नरहेको स्थानीयको दाबी छ । वडासचिव मण्डलले भारतीय नागरिक मोसताकले नेपाली नागरिकता प्राप्त गरेकोमा आफ्नो गल्ती नरहेको बताउँछन् ।उनले भने, ‘अमानत र रजिना वडा कार्यालयमा आएर एकैपटक तीन छोराको जन्मदर्ता बनाएका हुन् । त्यसकै आधारमा नागरिकताको सिफारिस भयो । अमानतलाई झुक्याएर सही गराई मोसताकको बुबा बनाएको कुरा झूठो हो ।’यता, वडाध्यक्ष अन्सारीले भिडभाडको बेला मोसताकको नागरिकताको सिफारिस गर्दा गल्ती भएको बताए ।‘सचिवलाई पठाएको थिएँ । उताबाट ठिक छ भनेर सिफारिस आएपछि मैले पनि हस्ताक्षर गरिदिएँ’, वडाध्यक्ष अन्सारीले भने ।

प्रकाशित मिति: २०२५-०३-२१ , समय : १६:३८:०५ , 2 weeks अगाडि