मधेस प्रदेशमा प्रहरीको आलोचना : सानो विवादमै गोली चल्याे

गामघर डेस्क

जनकपुरधाम । मधेस प्रदेशको बारामा घण्टौँसम्म भएको एक विवादमा नेपाल प्रहरी समयमा नपुग्दा गोली प्रहारसम्मको घटना भएको छ । आपराधिक गतिविधिबारे सूचना संकलन तथा प्रहरी गस्ती नहुँदा बारा जिल्लाको सुरक्षा व्यवस्था नै फितलो हुँदै गएको भन्दै प्रहरीको आलोचना भएको हो । यो घटना शुक्रबार राति साढे ९ बजेतिर भएको । सिमरा उपमहानगरपालिका–७ मा स्थानीय स्थानीय परशुराम गिरीको घरमा एक्कासि आक्रमण भएको थियो । सोही वडाका वडाध्यक्ष सुनिल गुप्ताको नेतृत्वमा गएको समूहले गिरीको गेटमा, झ्यालमा तथा घर वरिपरि गालीगलौज गर्दै ढुंगा र इँटा बर्साएका थिए । घटनाको भिडियो यतिबेला सामाजिक सञ्जालमा भाइरल भइरहेको छ ।

उक्त भिडिओमा घटना यतिमै सीमित भएको देखिँदैन, वडाध्यक्ष गुप्ता नेतृत्वको समूहले घरपरिवारमाथि आक्रमण गर्न थालेपछि गिरीले घरबाट एक राउण्ड हवाइफायर गरेका थिए । आफ्नो घर परिवारमाथि आक्रमण हुँदा बचाउमा कोही नआएपछि आफ्नो बचाउका लागि गोली चलाउनुपर्ने अवस्था आएको गिरीले प्रहरीमा बयान दिएका छन् ।डीएसपी शुभद्रा वाइवाले भनिन्, ‘गिरीको घर परिवारमाथि आक्रमण भइरहेपछि उनले एक राउण्ड हवाई फायर गरेको सबुत प्रमाण भेटिएको छ । हवाई फायर गरिसकेपछि घटना नियन्त्रणमा आएको थियो ।’

‘उक्त हवाई फायरपछि घटना नियन्त्रणमा आएको थियो । त्यसपछि मात्र हामीलाई सूचना आयो । अनि हाम्रो टोली तुरुन्त घटनास्थलमा पुगेको थियो,’ उनले भनिन् । उनले सिसिटिभी फुटेज झिकाएर थप अनुसन्धान भइरहेको बताइन् ।प्रहरीका अनुसार उक्त घटना शुक्रबार दिउँसो गिरीका परिवारबाट कसैले वडाध्यक्षलाई अश्लील शब्दसहित गाली गरेको थियो । डीएसपी वाइबाले भनिन्, ‘यही घटनाको बारेमा वडाध्यक्षले आफ्नो टोली लिएर सोधपुछ गर्न पुगेको बयान दिएका छन् । सोधपुछ गर्दा विवाद भएको वडाध्यक्षले स्वीकारेका छन् ।’ सिमरामा कलवार र गिरी समुदायबिच ‘टसल’ रहेकोले यो घटना भएको अनुसन्धानमा संलग्न एक प्रहरी अधिकारीले बताएका छन् । यता, प्रहरीको आलोचना भइरहेको विषयमा बारा जिल्लाका प्रहरी प्रमुख सन्तोष तामाङले भने, ‘हाम्रो सबै टोली होलीको सुरक्षामा खटिएको थियो, सबै ड्युटीमै थिए । तर यो घटनाको सूचना समयमा भएन । त्यही भएर यो घटना हुन पुग्यो ।’ ‘तर जे कारणले घटना भए पनि गलत भएको छ, छानबिन गरेर कसुरदारलाई प्रहरीले छोड्दैन,’ उनले थपे ।

प्रकाशित मिति: २०२५-०३-१६ , समय : ०७:४०:३६ , 3 weeks अगाडि