मधेस प्रदेश : पक्राउ परेको केही घण्टामै प्रहरी हिरासतबाट थुनुवा भागे

गामघर डेस्क

सिराहा । मधेस प्रदेशको सिराहामा प्रहरी हिरासतमा रहेका एक थुनुवा फरार भएका छन् । इलाका प्रहरी कार्यालय मिर्चैयाको नियन्त्रणमा रहेका अर्नमा गाउँपालिकाका असलम मन्सुरी बिहीबार साँझ हिरासतबाट फरार भएका हुन् ।

प्रहरीका अनुसार अभद्र व्यवहार मुद्दामा बिहीबार नै उनलाई पक्राउ गरिएको थियो । तर, केही घण्टामै उनी प्रहरी हिरासतबाट फरार भएको जिल्ला प्रहरी कार्यालयका सिरहाका सूचना अधिकारी डिएसपी वीरेन्द्रकुमार पासवानले बताए ।

इलाका प्रहरी कार्यालय मिर्चैयाका प्रहरी प्रमुख डीएसपी पञ्चकुमार बाखुले उनको खोजी कार्य तीव्र रूपमा भइरहेको बताए । ‘विभिन्न स्थानमा प्रहरी परिचालन गरेर हामी खोजीमा जुटेका छौँ’, उनले भने ।

यता प्रहरी स्रोतका अनुसार मन्सुरीको खोजीका लागि मिर्चैया क्षेत्रका विभिन्न स्थानमा विशेष सुरक्षा चेकजाँच गरिएको छ । साथै, उनी लुक्ने सक्ने सम्भावित स्थानहरूमा प्रहरी टोली परिचालन गरिएको छ ।

प्रकाशित मिति: २०२५-०३-१३ , समय : २२:०८:०६ , 3 weeks अगाडि