हाेलिकाे पुर्व सन्ध्यामा पत्रकार वैद्यनाथ यादव रिहा : मुख्य आरोपित हनुमानीले ११ लाख धरौटी बुझाउन नसक्दा कारागार चलान

गामघर डेस्क

राजविराज ।
हाेलिकाे पुर्व सन्ध्यामा ठगी विश्वासघात तथा संगठित अपराध आरोपमा पक्राउ परेका पत्रकार वैद्यनाथ यादव बुधबार रिहा भएका छन् । सप्तरी जिल्ला अदालत राजविराजको आदेशमा २५ हजार धरौटी बुझाएर पत्रकार यादव रिहा भएका हुन् ।
प्रहरीले यादवमाथि ठगी विश्वासघात तथा संगठित अपराध, प्रहरी प्रतिवेदन संगठित अपराध गरि विभिन्न चारवटा मुद्दा दर्ता गरि ५० दिन हिरासतमा राखी अनुसन्धान गरेका थिए । प्रहरीले पत्रकार यादवसहित सोही मुद्दाका अन्य आरोपीहरुलाई बुधबार अदालत पेश गरेका थिए ।
सप्तरी जिल्ला अदालतको फैसला अनुसार ठगी विश्वासघात तथा संगठित अपराध मुद्दामा २५ हजार धरौटी बुझाएर तथा बाँकी मुद्दाहरुमा साधारण तारेखमा रिहा भएको पत्रकार यादवले बताए । उनले राज्यले आतंक मच्चाए पनि अदालतबाट न्याय पाउँदा देशमा न्यायालय छ भन्ने आभास भएको प्रतिक्रिया दिए ।
उनले भाईसंग टेलिफोनमा भएको कुराकानी र छरछिमेकीसंग कुराकानी गरेको आधारमा ५० दिनसम्म विना साबुत प्रमाण प्रहरीले हिरासतमा राखी आफुमाथि ठुलो अन्याय गरेको टिप्पणी गरे ।
पत्रकार यादवसंगै मुख्य आरोपी रामबहादुर रजक ( हनुमानी), समिना खातुन र रुपेश यादव समेतलाई धरौटीमा रिहाई गर्न अदालतबाट आदेश भएको सप्तरीका प्रहरी प्रमुख एसपी ढकेन्द्र खतिवडाले बताए ।
एसपी खतिवडाका अनुसार हनुमानीलाई ११ लाख, रुपेशलाई २ लाख १९ हजार, खातुनलाई ३० हजार र पत्रकार यादवलाई २५ हजार धरौटी लिएर रिहा गर्न अदालतले आदेश गरेको छ ।
राम बहादुर रजक (हनुमानी) तत्काल धरौटी बुझाउन नसक्दा कारागार चलान भएको तथा अन्य ३ जनाले धरौटी बुझाएर बुधबारै रिहा भएको एसपी खतिवडाले जानकारी दिए ।

प्रकाशित मिति: २०२५-०३-१२ , समय : २१:३९:१४ , 3 weeks अगाडि