मधेस प्रदेशको विभिन्न नाकाहरुबाट खुलेआम तस्करी : सशस्त्रका घुमुवाहरु खुलेआम असुली गर्ने गरेको खुलासा

गामघर डेस्क

जनकपुरधाम । मधेस प्रदेशको पर्साका विभिन्न नाकाहरुबाट तस्करी बढेको छ । पर्साको वीरगन्ज नाकाको आसपास लगायत ग्रामीण नाकाबाट मिलोमतोमा तस्करी फस्टाएको हो । पर्साको ग्रामीण भेग र वीरगन्ज आसपास रहेका नाकाबाट रजनीगन्धा, लत्ता कपडा, सटिङसुटिङको कपडा, हार्डवेयर, मोटरपार्टस, स्टिलको भाँडाकुँडाहरु लगायतका सामानहरुको व्यापक तस्करी भैरहेको छ । नेपाल भारतको प्रमुख प्रवेशद्वारको रुपमा रहेको पर्सा जिल्लाका ग्रामीण भेगबाट पर्सा प्रहरीले ठूलो मात्रामा तस्करीको लाईन संचालन गर्न तस्करहरुलाई छुट दिएपछि वीरगन्ज भन्सार कार्यालयको राजश्व असुली प्रभावित भएको हो ।
धोरे नाकाबाट कपडा तस्करीको लाइन पाउनेहरूमा फुलकवल निवासी सरफदेव यादव, अशोक साह, जितेन्द्र साह र गमहरिया निवासी आलम रहेको समाचार स्रोतले बताएको छ ।सशस्त्र प्रहरीसँग बलियो सेटिङ गरेर उनीहरूले ठूलो मात्रामा कपडाको तस्करी गरेका छन् । दैनिक पचास लाख भन्दा बढीको कपडा उनीहरूले सशस्त्र प्रहरी सेटिङमा भन्सार छली तस्करी गरिरहेको स्रोतको दाबी छ । धोरे नाकाबाट पाउडर दूध, काजु किराना समान र किराना समान भित्रै बारुदजन्य पटाका, हार्डवेयर र कपडा राखेर तस्करी गर्ने दर्जनभन्दा बढी साना ठुला तस्करहरू काम गरिरहेका छन् ।
आइतबार र बिहीबार जगरनाथपुरमा लाग्ने पशु हार्ट बजारका लागि भारतको सीमावर्ती गाउँ इनर्वा हुँदै जानकीटोला र पाण्डेपुर नाकाबाट राँगाभैसी तस्करी भएको छ । भैँसी बजारमा तस्करीको राँगाभैंसी खरिद बिक्री हुँदै आएको छ ।
छपकैया नाकाबाट वीरगंजका जितु कपडा, बबन कपडा, ध्रुप कपडा, श्याम काजु, पशुपति काजु, गम्भिरा काजु, हरिन्द्र पटेल, आकाश, रामबाबु मन्जु काजु लगायतका तस्कर समूहहरूले दैनिक ५० लाख भन्दा बढीको मालसामान तस्करीको माध्यमबाट आयात गर्दै आएका छन् । रातीको समयमा दर्जनौँ महिला भरिया, मोटरसाइकल, ई–रिक्सा लगायतको माध्यमबाट तस्करी गरिरहेका छन् । वीरगंजको आदर्श नगरमा सञ्चालन रहेको दर्जनौँ ट्रान्सपोर्टहरुबाट पनि सशस्त्र प्रहरीले असुली गर्दै आएको छ ।
सशस्त्र सिमा सुरक्षा गुल्म १२ नम्बर गणका गुल्मपति सशस्त्र प्रहरी उपरिक्षक राधेश्याम धिमालको नाममा तस्करहरुसंग अवैध रकम असुल भईरहेको पाएको छ । उनी मातहत कार्यरत रहेका सशस्त्र प्रहरीले नै सशस्त्र प्रहरी उपरिक्षक धिमालको नाममा रकम असुल गरिरहेका छन । विगत एक बर्ष देखि पर्सामा कार्यरत रहेका घुमुवा प्रहरी जवान राजाराम यादवले अवैध असुली थालेका हुन । सशस्त्र प्रहरी जवान यादव करिब एक बर्षदेखि वीरगन्ज महानगरपालिका क्षेत्रभित्र पर्ने सिमावर्ती नाका ईनर्वा गाँउ , मुख्य भन्सार , छपकैया , अलौ , कोनिया ,अमरपट्टी ,झौवा,प्रसौनी भाटा लगायतका नाकाहरुबाट अवैध रुपमा चोरी पैठारी गर्ने कारोबारीहरुसंग यादवले महिनावारी असुल गरीरहेको पाएको हो । रकम नबुझाउने व्यापारीहरु मालसमान समातेर भन्सार बुझाउने गरेका छन । पर्सा जिल्लाको सिमावर्ती नाकाहरुबाट अहिले चौकीका घुमुवा देखि सिमामा खटेका प्रहरीको मिलेमतोमा तस्करहरुले भारतीय कपडा ,हार्डवेयर पार्टपुर्जा , ड्राईफ्रुट , खाद्यान्न लगायतका समानहरु भन्सार छलि गरी वीरगन्जमा भित्रियाईरहेका छन । वीरगन्जमा अवैध रुपमा भित्रिएका मालसमानहरु वीरगन्जका विभिन्न ट्रान्सपोर्टका माध्यमले नेपालका विभिन्न शहरमा जान गरेका छन ।
प्रसौनीभाठ्ठा नाकाबाट भारतीय ब्रान्डका पाउडर दूध, काजु र किराना आइटमको तस्कर रमेश सहित ५ जनाको समूह र गर्दौल निवासी शहनी थरका व्यक्तिले मासिक मोटो रकम बुझाएर तस्करी गर्दै आएका छन् ।सेटिङमा अजय, प्रकाश, र रवीन्द्र गुप्ताले पनि किराना समानको तस्करी गरिरहेका छन् । प्रसौनीभाठ्ठा गाउँमा प्रहरीकै संरक्षणमा ५ वटा घरेलु मदिरा भठी पनि सञ्चालनमा छन । प्रहरीले अमरपटीका मुना, ईन्दल, राजकुमार र जिउतसंग रकम बुझेर अवैध घरेलु मदिरा भठी सञ्चालन गर्न छुट दिएका छन् । मुना भने भारतीय नागरिक हुन र उनको अमरपटीमा सबै भन्दा ठुलो भठी रहेको छ । अमरपटी नाकाबाट सन्दिपले युनिलिभरका क्लजपपेस्ट, फेयरलवली लगायतका कष्टमेटिक समान, मुना, भोला र भुलन कपडा, सुनिल राजनिवास र रजनीगन्धा, बिनय हार्डवेयर, बिगा र संजय कबाड , भुवन यादव दुहिने भैँसी, टुना अमरदेव छोटेलाल र पिन्टु धान गहुँको तस्करी गर्ने गरेका छन् । मोटरसाइकल, साइकल र पैदल भरिया मार्फत रातारात कुखुराको चल्ला तस्करी भइरहँदा प्रहरीले नियन्त्रण गरेको छैन। तस्करहरूले खुलेआम दिनदहाडै भन्सार छलेर अवैध रूपमा भारतीय सामान तस्करी गरी पर्साका ग्रामीण बजार पोखरिया, केहुनिया, महुवन बजार, विश्रामपुर, डकैला, निचुटा, देउरिया, बढनिहार, रंगपुर, परवानीपुर र जीतपुरलगायतका ठाउँमा सञ्चालनमा रहेका पसलमा दिने गरेका छन् ।
सशस्त्र प्रहरीले सोमबार वीरगन्जबाट २५ लाखभन्दा बढीको भन्सार छलीको कपडा बरामद गरेको छ ।विशेष सूचनाको आधारमा प्रस्तावित सीमा सुरक्षा गुल्म वीरगन्जबाट खटिएको टोलिले विरगन्ज भन्सार कार्यालयको सहयोगमा वीरगन्ज महानगरपालिका–६ महावीर स्थानबाट चाचान मार्केटमा रहेको शिवम इम्पोरियम पसल र मार्केटको पूर्वपट्टि त्रिभुवन राजपथमा रहेको बाबुलाल चाचानको पुरानो घरको ग्राउन्ड फ्लोरमा अवैध रुपमा गोदाम गरेर राखेको २५ लाख ११ हजार ५ सय ३० रुपैयाँ बराबरको कपडा बरामद गरेको हो । बरामद कपडा वीरगन्ज भन्सार कार्यालयमा बुझाएको छ ।सशस्त्र प्रहरी पर्सामा सूचना अधिकारी सशस्त्र प्रहरी नायव उपरीक्षक नरेन्द्र सिंह धामीले जानकारी दिएका छन् । नव जनप्रहारबाट

प्रकाशित मिति: २०२५-०३-०५ , समय : १७:४६:४९ , 1 month अगाडि