रिंकु बलात्कार घटना : मुख्य आरोपितहरू भने अझै फरार

गामघर डेस्क

सिरहा। मधेस प्रदेशको सिरहाको नवराजपुर गाउँपालिका–१ भगवतीपुरकी रिंकुकुमारी सदायको शंकास्पद मृत्यु प्रकरणमा पञ्चायतमा सहभागी तीनजना पक्राउ परेका छन् । पक्राउ पर्नेहरुमा नवराजपुर गाउँपालिका–१ भगवतीपुर गाउँका करिब ८४ वर्षीय चन्देश्वर मण्डल, ४५ वर्षीय रामविनोद मण्डल र ४५ कमलेशकुमार दास छन् ।
प्रहरीले उनीहरूमाथि सोमबार सिरहा जिल्ला अदालतबाट पाँच दिनको म्याद लिएको हो ।प्रहरीले आइतबार यो घटनामा अनुसन्धानका लागि चार जनालाई नियन्त्रणमा लिएको थियो । तर, त्यसमध्ये एक जना निर्दोष पाइएपछि छाडिएको र स्थानीय चन्देश्वर मण्डल, रामविनोद मण्डल र कमलेश दासमाथि थप अनुसन्धानका लागि अदालतबाट पहिलोपटक पाँच दिनको म्याद लिएको प्रहरीले जनाएको छ । उनीहरूमाथि पञ्चायतद्वारा लेनदेन गरी मिलापत्र गर्न गराउन संलग्न रहेको कसुरमा मुद्दा दर्ता गरिएको जिल्ला प्रहरी कार्यालय सिरहाका प्रहरी प्रवक्ता डीएसपी वीरेन्द्रकुमार पासवानले जानकारी दिए ।उनीहरुलाई इलाका प्रहरी कार्यालय लाहानको हिरासतमा राखिएको छ ।
मृतक परिवारले गत फागुन ८ गते चारवटा मुद्दामा ८ जनाविरुद्ध पूरक जाहेरी दिएको थियो ।कर्तव्य ज्यान, जबर्जस्ती करणी, शरीर बन्धक र लेनदेन मिलापत्र गरी चारवटा शीर्षकमा ८ जनाविरुद्ध इलाका प्रहरी कार्यालय, लहानमा जाहेरी परेको थियो ।सामूहिक बलात्कार आरोपका तीन जना र गाउँमै मिलाउन खोज्ने पाँच जना रहेका छन् । यद्यपि पूरक जाहेरी परेका मध्येबाट अहिलेसम्म कोही पनि पक्राउ परेका छैनन् ।तर, घटनाका मुख्य आरोपितहरू भने अझै पक्राउ पर्न सकेका छैनन् । घटना सार्वजनिक भएपछि प्रहरीले बलात्कारमा संलग्न तीन र पञ्चायती गरेर घटना गाउँमै मिलाउन खोज्ने पाँच गरी आठ जनाविरुद्ध पीडित परिवारबाट गत बिहीबार कर्तव्य ज्यान, शरीर बन्धक, जबर्जस्ती करणी र आत्महत्या दुरुत्साहनको पूरक जाहेरी लिएको थियो । उनीहरूको मधेश प्रदेश प्रहरी, जिल्ला प्रहरी र लहानको इलाका प्रहरीको तीन वटा टोलीले खोजी गरिरहेको घटना छानबिन टोलीका संयोजक प्रदेश प्रहरीका एसएसपी शान्तिराज कोइरालाको भनाइ छ ।
गत माघ २७ को राति शौच गर्न बाहिर निस्केकी रिंकुकुमारी गाउँकै रूपेश मण्डल, चन्दन साह र रामविनय मण्डलको अपहरणपछि सामूहिक बलात्कारमा परेका थिइन् । तर, पीडितलाई प्रहरीमा पठाउनुको साटो वडासदस्य नथुनी साह, रामपुकार मण्डल, रामपृत साह, रामकृपाल मण्डल, विन्देश्वरलगायतले घटना गाउँमै मिलाउन पञ्चायती गरेका थिए ।माघ २९ र ३० मा गाउँकै दलानमा भएको पञ्चायतीले पीडकबाट १ लाख ४० हजार जरिवाना भराउने र पीडितलाई प्रहरीमा जान नदिने निर्णय गरेको थियो । तर, पञ्चायतीमा आरोपितका आफन्त बीच नै पैसा तिर्ने विषयमा विवाद भएको थियो । त्यसपछि किशोरी ३० गते साँझ आफ्नै घरमा झुन्डिएको अवस्थामा मृत भेटिएकी थिइन् । वडासदस्यसहितका स्थानीयको संलग्नतामा पञ्चायती बसेर घटना गाउँमै मिलाउने प्रयास गरिएको थियो ।

यता नेकपा माओवादी केन्द्रका अध्यक्ष पुष्पकमल दाहालले रिंकु सदाको घरमा पुगेर न्याय दिलाउने आश्वासन दिनुभएको छ । जनजागरण अभियानको क्रममा सिरहा आइपुग्नुभएका दाहाल शनिबार बिहान सामूहिक जबरजस्ती करणीपछि मृत भेटिएकी रिंकु सदाको घरमा रिंकुको परिवारलाई भेट्न पुग्नुभएको हो ।
नवराजपुर गाउँपालिका-१ भगवतीपुरस्थित मुसहर बस्तीमा रहेको रिंकुको घरमा दाहालसँगै नेताहरू नारायणकाजी श्रेष्ठ, अग्निप्रसाद सापकोटा, देव गुरुङ, वर्षमान पुन, जनार्दन शर्मालगायतका नेताहरू पनि पुग्नुभएको थियो ।
रिंकुको परिवारका सदस्यसँग भेटघाट र कुराकानी गर्दै दाहालले यो घटनाले आफू निकै दु:खी बनाएको र आफ्नो पार्टी न्यायका लागि आवाज उठाउने बाचा गर्नुभयो । ‘हामी न्यायका लागि आवाज उठाउँछौं,’ उहाँले भन्नुभयो, ‘प्रहरीलाई पनि छिटो काम गर्न भन्छौं ।’
गत माघ २७ गते राति शौच गर्न बाहिर निस्केकी रिंकु स्थानीय तीन जना युवकबाट सामूहिक जबरजस्तीमा परेकी थिइन् । उनी भोलिपल्ट बिहानमात्रै रुँदै घर पुगेकी थिइन् । तर, वडासदस्यसहितका स्थानीयको संलग्नतामा २९ र ३० गते पञ्चायती बसेर घटना गाउँमै मिलाउने प्रयास गरिएको थियो ।
पञ्चायतीले पीडकबाट १ लाख ४० हजार जरिवाना भराउने र पीडितलाई प्रहरीमा जान नदिने निर्णय गरेको थियो । तर, पञ्चायती नमिल्दा पीडक पक्षको धम्कीका बीच ३० गते साँझ पीडित किशोरी आफ्नै घरमा झुन्डिएको अवस्थामा मृत भेटिएकी थिइन् ।प्रहरीले जबरजस्ती करणीमा संलग्न तीन जना र पञ्चाती गर्ने ५ जना गरी ८ जनाविरुद्ध जाहेरी लिएर अनुसन्धान गरिरहेको छ । यता अनुसन्धानका क्रममा तीन जना प्रहरीको नियन्त्रणमा छन् ।

प्रकाशित मिति: २०२५-०३-०१ , समय : १५:४८:०३ , 1 month अगाडि