महाकुम्भ स्नानका लागि भारत गएका सप्तरीका तीन जना अझै सम्पर्कविहीन

सुधा देब

राजविराज । महाकुम्भ स्नानका लागि भारत गएका सप्तरीका तीन जना सम्पर्कविहीन भएका छन् । महाकुम्भ स्नानका लागि भारत गएका सप्तरीका दिदीभाइ सम्पर्कविहीन भएको सात दिन भइसकेको छ ।

सप्तरीको महादेवा गाउँपालिका वडा नं–६ ढिकुलीका वर्ष ६५ का उमाकान्त झा र उहाँका ६८ वर्षीया दिदी इन्दिरादेवी झा फागुन ११ गतेदेखि काशी विश्वनाथबाट सम्पर्कविहीन भएको उमाकान्त झाका छोरा दुर्गानन्द झाले जानकारी दिनुभयो ।

महदेवा गाउँपालिका मंसापुरबाट आमाबुबा, फुपूसहित ३५ जनाको समूहमा गत शनिबार महाकुम्भ स्नानका लागि भारत तर्फ गएका थिए । आइतबार काशी विश्वनाथको दर्शनका लागि लाइनमा लागेको बेला लाइनबाटै उहाँहरू सम्पर्कविहीन भएका हुन् ।

सम्पर्कविही व्यक्तिहरूलाई उहाँहरूसँग गएका साथीले खोजी गरेपनि कुनै पत्ता नलागेपछि उनीहरू महाकुम्भस्नान गरेर फर्किसकेका छन् ।

दुर्गानन्द झाले भन्नुभयो, ‘‘बुवा र फुपुको सामान सबै बसमै छ । उहाँहरूसँग लगाएको लुगा बाहेक केही छैन । उहाँहरूको फोन नम्बर पनि थाहा छैन । कसरी आउनुहुन्छ भन्ने चिन्तालागेको छ ।’’

बुवा र फुपूको खोजीका लागि सबै पक्षसँग सहयोगका लागि उहाँले आग्रह गर्नुभएको छ ।

यसअघि राजविराज नगरपालिका वडा नम्बर ७ हटियाका वीरेन्द्रकुमार साहका २० वर्षीया छोरी रोशनीकुमारी साह भारतको उत्तरप्रदेशको अयोध्याको राममन्दिरबाट सम्पर्कविहीन भएको १४ दिन बितिसक्दा समेत फेला पर्न सक्नुभएको छैन ।

परिवारकासहित महाकुम्भ स्नानका लागि फागुन ३ गते राममन्दिर दर्शन गरेर फर्किदै गर्दा रोशनी सम्पर्कविहीन हुनुभएको थियो ।

यता परिवारले अयोध्यामा बसेर निरन्तर खोजी गरिरहँदा समेत सम्पर्क हुन सकेको छैन । छोरीको खोजका लागि परिवारले सबै पक्षसँग आग्रह गर्दै आएका छन् ।

प्रकाशित मिति: २०२५-०३-०१ , समय : १३:०३:४९ , 1 month अगाडि