सप्तरीको सीडीओ दाहालद्वारा राजविराज नगरपालिकामा आकस्मिक छड्के निरीक्षण : २४ जना कर्मचारी अनुपस्थित

गामघर डेस्क

राजविराज । जनगुनासो बढ्दै गएपछि सप्तरीका प्रमुख जिल्ला अधिकारी (सीडीओ) भोला दाहालले राजविराज नगरपालिकाका विभिन्न शाखाहरूमा आकस्मिक छड्के निरीक्षण गरेका छन्।
निरीक्षणका क्रममा ५९ कर्मचारीमध्ये अधिकृतसहित २४ जना कर्मचारी कार्यालयमा अनुपस्थित भेटिएको हाे । सीडीओ दाहालका अनुसार अनुपस्थित कर्मचारीहरूको हाजिरी नाम प्रशासन कार्यालयमा लगेर आवश्यक निर्देशन दिइएको छ भने कारबाही प्रक्रिया अघि बढाइने जनाएको छ ।
मुख्य तथ्यहरू नगरपालिका प्रमुख प्रशासकीय अधिकृत डा. श्रवण कुमार साह अनुपस्थितका साथै महत्त्वपूर्ण शाखा प्रमुखहरू शिक्षा शाखाका भोगेन्द्र यादव ,स्वास्थ्य शाखाका निरञ्जन यादव ,योजना शाखाका प्रकाशकुमार गुप्ता लगायत अन्य अधिकृतहरू अनिता चौधरी, ज्योतिष यादव लगायतका अन्य कर्मचारीहरूको अनुपस्थित रहेको जानकारी दिए ।
जिल्ला प्रशासन कार्यालय सप्तरीका नायब सुब्बा ब्राइटर साहले पनि यस छड्के निरीक्षणबारे जानकारी गराउँदै अनुपस्थित कर्मचारीहरूलाई प्रमुख जिल्ला अधिकारी भोला दाहाल आवश्यक निर्देशन अनुसार कारबाही प्रक्रिया अगाडि बढाउने बताए ।
राजविराज नगरपालिकामा उच्च तहका अधिकृतहरू समेत कार्यलय समयमा अनुपस्थित रहनु प्रशासनिक लापरबाहीको चरम उदाहरण हो। सेवाग्राहीहरूले सरकारी सेवामा समयमै पहुँच नपाउँदा असन्तुष्टि व्यक्त गरेका छन्।
सीडीओ दाहालले यस्ता छड्के निरीक्षणलाई निरन्तरता दिने र गैरजिम्मेवार कर्मचारीहरूलाई नगरपालिका मर्मत आवश्यक कारबाही गरिने स्पष्ट संकेत दिएका छन्। अब प्रशासनले यसलाई कत्तिको प्रभावकारी बनाउँछ भन्ने कुरामा जनताको चासो बढेको छ।

प्रकाशित मिति: २०२५-०१-३१ , समय : १८:२२:५६ , 2 months अगाडि