सप्तरीका प्रमुख जिल्ला अधिकारीद्वारा सडक स्तरोन्नति कार्यमा कडा निर्देशन

गामघर डेस्क

राजविराज ।
सप्तरीका प्रमुख जिल्ला अधिकारी (सिडिओ) भोला दाहालले जिल्लाका मुख्य सडक खण्डहरूको स्तरोन्नति कार्य तत्काल सम्पन्न गर्न कडा निर्देशन दिएका छन्। आज लहान डिभिजन सडक कार्यालयका इन्जिनियर जीवत यादव, सुरेन्द्र दास, ठेकेदार कम्पनी शाह , इन्जिनियरिङ कन्स्ट्रक्सनका प्रतिनिधि सुलभ पौडेललगायतको उपस्थितिमा बसेको बैठकमा सिडिओ दाहालले समयमै काम सम्पन्न गर्न कडा निर्देशन दिएका हुन्।
अलपत्र परेका सडक योजनाहरू…
सप्तरी जिल्लाको सदरमुकाम राजविराजलाई जोड्ने मुख्य सडक खण्डहरू – भारदह-राजविराज, रूपनी-राजविराज, र भारत सीमाना-राजविराज खण्ड – तीन वर्षअघि नै सुरु भए पनि हालसम्म पनि अलपत्र अवस्थामा रहेका छन्। ठेकेदार कम्पनीको लापरवाही, ढिलासुस्ती र सरोकारवाला निकायको उदासिनताका कारण यी योजनाहरू अधुरै छन्।

सर्वसाधारणको समस्याहरू….

सडक स्तरोन्नतिको कार्य समयमा सम्पन्न नहुँदा स्थानीय बासिन्दाहरूले लामो समयदेखि सास्ती भोग्दै आएका छन्। केही समयअघि हिलोले भरिएका सडकहरूमा धान रोपेर विरोध जनाएका स्थानीयहरूले पछिल्लो समय टायर बालेर प्रदर्शनसमेत गरेका छन्। यस्ता क्रियाकलापहरूले सर्वसाधारणको आक्रोश झन् बढाउँदै गएका छन्।
CDO दाहाल को कदमप्रदर्शन र जनगुनासाहरूका बीच सिडिओ दाहालले ठेकेदार कम्पनी र सम्बन्धित निकायलाई कडा रूपमा निर्देशन दिएका छन्। उनले सडक स्तरोन्नति, कालोपत्र र मर्मत कार्य तत्काल सम्पन्न गरी जनतालाई राहत दिन स्पष्ट निर्देशन दिएका हुन्।
सप्तरीका मुख्य सडकहरूको स्तरोन्नति कार्यले जिल्लाको यातायात सुविधा मात्र सुधार्ने नभई समग्र विकासमा पनि महत्वपूर्ण योगदान पुर्‍याउने विश्वास लिइएको छ। प्रमुख जिल्ला अधिकारीको सक्रियताले अब छिट्टै सकारात्मक परिणाम देखिने अपेक्षा सर्वसाधारणहरुले गरेको छ।

प्रकाशित मिति: २०२४-१२-०३ , समय : १९:५९:०३ , २ हप्ता अगाडि