मधेस प्रदेश : महिलाको हत्यामा संलग्न रहेको आरोपमा तीनजना पक्राउ

गामघर डेस्क

जनकपुरधाम । यही मंसिर ८ गते मधेस प्रदेशको धनुषाको आमाखोलामा मृत भेटिएकी एक महिलाको हत्यामा संलग्न रहेको आशंकामा प्रहरीले तीनजनालाई पक्राउ गरी सार्वजनिक गरेको छ ।
शुक्रबार जिल्ला प्रहरी कार्यालयले जनकनन्दिनी गाउँपालिका–३ बस्ने २२ वर्षीय रामललित खत्वे मण्डल, सोही ठाउँका २० वर्षीय ज्ञानेन्द्र दास र सहिदनगर नगरपालिका–८, नाथपट्टी बस्ने २४ वर्षीय रमेशकुमार मण्डललाई सार्वजनिक गरेको हो । गत मंसिर ८ गते जनकनन्दिनी गाउँपालिका–४, खजुरी र कमला नगरपालिका–२, सरावेको बीच सिमानामा रहेको आमाखोलामा नामथर नखुलेकी एक महिलाको शव प्लाष्टिकको बोराभित्र रहेको अवस्थामा फेला परेको थियो । पछि ती महिला जनकनन्दिनी गाउँपालिका–५ उधा टोल निवासी रेखाकुमारी मण्डल रहेको खुल्न आएको थियो ।
पत्रकार सम्मेलनमा धनुषाका प्रहरी प्रमुख, प्रहरी उपरीक्षक भुवनेश्वर तिवारीले मृतकलाई घटनास्थलमा ल्याउन ज्ञानेन्द्र दास र रमेशकुमार मण्डलले सहयोग गरेको र राम ललित मण्डल खत्वेले ढुंगाले अनुहारमा प्रहार गरी मुर्छित बनाई घाँटी रेटेर हत्या गरेको खुल्न आएको बताए ।
यता मृतकसँग विवाह गर्ने सम्बन्धमा विवाद भएपछि घटना भएको देखिएको उनले जानकारी दिए । मृतक र खत्वेबीच ५/६ वर्षदेखि रामललित मण्डल खत्वेबीच प्रेम सम्बन्ध रहेको बताइएको छ ।

प्रकाशित मिति: २०२४-११-३० , समय : ११:४७:३५ , २ हप्ता अगाडि