भ्रष्टाचारविरुद्ध देशव्यापी आन्दोलन अघि बढाउँछौँ : अध्यक्ष प्रचण्ड

गामघर डेस्क

लहान ।
नेकपा माओवादी अध्यक्ष पुष्पकमल दाहाल प्रचण्डले पार्टीको सांगठनिक शक्ति सुदृढ गरी भ्रष्टाचारविरुद्ध देशव्यापी आन्दोलन गर्ने बताएका छन् । सिराहाको कर्जन्हा नगरपालिकामा आयोजित पार्टी कार्यकर्ता तथा स्थानीयसँग मंगलबार भेटघाट गर्ने क्रममा उनले आन्दोलनको तयारीका लागि आफूहरू देशव्यापी बैठक र छलफलमा रहेको जानकारी दिए ।

पार्टीको मधेश प्रदेशस्तरीय परामर्श बैठकमा भाग लिन महोत्तरीको बर्दिवास जाने क्रममा कर्जन्हा पुगेका उनले मुलुकको अहिलेको ठुलो समस्या भ्रष्टाचार भएकाले जनताको साथमा भ्रष्टाचारी र माफियाविरुद्ध देशव्यापी आन्दोलन गर्नु आवश्यक रहेको बताए । ‘तपाईंहरूले देखिहाल्नुभयो भ्रष्टाचारविरुद्ध केही गर्न खोज्दा सरकार नै परिवर्तन गर्नेसम्मको खेल भयो,’ उनले भने ‘हामीले सरकारको नेतृत्व गर्दा केही नयाँ काम सुरु गरेका थियौँ । सुशासनका पक्षमा र भ्रष्टाचारविरुद्ध हामीले थालेको अभियानबाट भूमाफियाहरू आत्तिए । जसले सरकारी जग्गा व्यक्तिका नाममा लैजाने अपराध गरिरहेका थिए, उनीहरू छटपटाए ।’

मिटरब्याजलगायत बेथितिविरुद्ध आफूहरूले सरकारबाट संकल्पसहित संघर्ष सुरु गरेको स्मरण गर्दै उनले भने, ‘त्यसबाट दलाल, सामन्तवादका अवेशष, भूमाफिया र नोकरसाहहरू आतंकित भए ।’ कांग्रेस र एमालेलाई आफ्नो नेता ठानेर भ्रष्टाचारी र बिचौलियाले जुटाइदिएको दाबी गर्दै उनले सरकारमा रहँदा भ्रष्टाचारविरुद्ध लडाइँ लडेकाले आफूहरू सरकारबाट बाहिरिँदा विजेता कमान्डर बनेर निस्केको दाबी गरे । उनले अब देशैभरि पार्टी पुनर्गठन गर्दै बलियो बनाएर भ्रष्टाचारविरुद्ध तलैबाट आन्दोलन सिर्जना गर्ने योजना रहेको सुनाए ।

आफ्नो पार्टीले अघि सारेको गणतन्त्र, संघीयता, समावेशी, समानुपातिक एजेन्डाप्रति मधेशी जनसमुदायको अपार विश्वास भएको उल्लेख गर्दै उनले यो विश्वासलाई कमजोर हुन नदिई पार्टी संगठन र नेतृत्व स्थापित गरेर जाने प्रतिबद्धता व्यक्त गरे । उनले पार्टीलाई मधेशमा थप एकताबद्ध र सुदृढ बनाउँदै पहिलो पार्टीको रूपमा स्थापित गरी स्थानीय, प्रदेश र संघीय सरकारमा सशक्त हस्तक्षेप बढाउन मधेश प्रदेशको महत्वपूर्ण भूमिका रहने विश्वास व्यक्त गरे । नयाँ पत्रिका

प्रकाशित मिति: २०२४-०९-११ , समय : ०८:५८:५२ , 7 months अगाडि