मधेस प्रदेश : धारिलो हतियार प्रयोग गरी सीमावर्ती गाउँमा एक महिलाको हत्या

गामघर डेस्क

सिरहा ।
मधेस प्रदेशको सिरहाको दक्षिणी सीमावर्ती बरियारपट्टि गाउँपालिका ३ शिवनगर गाउँमा धारिलो हतियार प्रयोग गरी महिलाको हत्या भएको अवस्थामा शव भेटिएको छ ।

जिल्ला प्रहरी कार्यालय सिरहाका अनुसार स्थानीय निर्भय यादवको सिसौ/ मसलाको घारीमा आइतबार दिउँसो करिब साढे १२ बजेतिर करिब २५ वर्षकी नाम थर ठेगाना नखुलेकी महिलाको धारिलो हतियार प्रयोग गरी हत्या भएको अवस्थामा शव भेटिएको हो । शव भेटिएको खबर पाएलगत्तै जिल्ला प्रहरी कार्यालयबाट खटिएको अनुसन्धान टोलीले घटनास्थल तथा लाश जाँच प्रकृति मुचुल्कालगायतका प्रारम्भिक चरणका अनुसन्धान प्रक्रिया पुयार्ई शव पोष्टमार्टमका लागि जिल्ला सदरमुकामस्थित प्रादेशिक अस्पतालको शव गृहमा राखिएको सिरहा प्रहरीका प्रहरी निरीक्षक दिपककुमार सिंहले जानकारी दिए ।

उनका अनुसार मृतक अन्य जिल्ला, प्रदेश तथा छिमेकी मुलुक भारतकोसमेत हुनसक्ने भएकाले मृतकको फोटोसहित हुलिया/ सनाखतका लागि सबै प्रहरी युनिट तथा आवश्यक ठाउँहरुमा पठाइएको छ । गहुँ गोरी वर्ण, नाम थर ठेगाना नखुलेकी, पाँच फिट उचाइकी मृतक महिलाले पहेलो कुर्ता सुरुवाल, खरानी रङको सल, गुलावी म्याजिक ब्राण्डको चप्पल, बायाँ हातमा कालो फित्ता भएको घडी, घाँटीमा पहेलो धातुको सिक्री भेटिएको उनले बताए ।

प्रहरीले मृतकको दायाँ हातको ठूली कान्छी औंलामा सी+एस लेखिएको औंठी र बायाँतर्फ पेटको भागदेखि तिघ्रासम्म जलेको पुरानो घाउको चिन्ह्र पाइएको महिलालाई कोही कसैले सनाखत पहिचान गरेमा तत्काल जिल्ला प्रहरी वा नजिकको प्रहरी कार्यालयमा सम्पर्क गर्न अनुरोध गरेको छ । नयाँ पत्रिकाबाट

प्रकाशित मिति: २०२४-०६-१७ , समय : ११:२९:२६ , ७ महिना अगाडि