सप्तरीमा सशस्त्र प्रहरीका असय हत्या गर्नेलाई जन्मकैदको सजाय
मिति: २०२३-०२-२१ , समय : १४:५०:३७ , शुभ नारायण यादव
शुभ नारायण यादव
सप्तरी ,९ फाल्गुन । सप्तरीमा सशस्त्र प्रहरीका असईको हत्या गरेको अभियोगमा एक जना प्रहरी जवानलाई जन्मकैदको सजाय सुनाएको छ।
जिल्ला न्यायाधीश नविनकुमार जोशीको इजलाशले सशस्त्र प्रहरी जवान ३९ वर्षीय होमबहादुर खत्रीलाई जन्मकैद सजाय सुनाएको हो । उनले सशस्त्र प्रहरी बल गण नम्बर ६ हेडक्वाटर राजविराजमा दरबन्दी भई सप्तरीको छिन्नमस्ता गाउँपालिका वडा न.–३ मोहनपुरस्थित सशस्त्र प्रहरीको बोर्डर आउटपोस्ट (बीओपी)मा कार्यरत असई ४५ वर्षीय सत्यनारायण यादवको हत्या गरेका थिए ।
जिल्ला न्यायाधीश श्यामबिहारी मौर्यको इजलाशले कात्तिक २२ गते खत्रीलाई पुर्पक्षका लागि कारागारमा पठाउने आदेश दिएको थियो। अदालतले अभियुक्त खत्रीलाई जन्मकैदका साथै तीन लाख रुपैयाँ क्षतिपूर्ति भराउने र फौजदारी कसूर पीडित राहत कोषमा २ हजार ८ सय रुपैयाँ जम्मा गराउने फैसला गरेको हो ।
सिरहाकाे भगवानपुर गाउँपालिका–२ नरहाका असई यादव र ओखलढुङ्गा जिल्ला खिजिदेम्वा गाउँपालिका–२ निवासी खत्री सप्तरीको छिन्नमस्ता गाउँपालिका वडा न.–३ मोहनपुरस्थित सशस्त्र प्रहरीको बोर्डर आउटपोस्ट (बीओपी)मा कार्यरत थिए ।
बयानका क्रममा अभियुक्त खत्रीले २०७९ असोज १९ गते राति असई यादवको हत्या गरेको स्वीकारेका थिए । खत्रीले वियर खाएर यादवले आफूमाथि लाठीले हिर्काएको बताएका थिए । रिस थाम्न नसकी हुत्याउँदा यादवको टाउकोमा चोट लागेको र दोहोर्याएर धकेल्दा टाउको पछाडि ठोक्किएर घ्यार घ्यार गर्न थालेपछि घाँटी थिचेर हत्या गरेको खत्रीले बयानमा भनेका थिए।
बीओपीभित्रै हत्या गरिएका यादवको शव भने नेपाल–भारत सीमाभन्दा तीन किलोमिटर दक्षिण भारत बिहार राज्यको मधुवनी जिल्लाअन्तर्गत जिरोगा पुनर्वासस्थित खोलामा असोज २० गते फेला परेको थियो । यता असय यादवकाे शव फेला परेको एक सातापछि असोज २६ गते अभियुक्त खत्रीलाई पक्राउ गरिएको थियो ।
प्रकाशित मिति: २०२३-०२-२१ , समय : १४:५०:३७ , २ वर्ष अगाडि
