आज महाशिवरात्रि पर्व मनाइँदै: सप्तरी सहित मुलुकभरका शिव मन्दिरहरुमा भक्तजनहरुकाे भिड

गामघर डेस्क

राजविराज । आज महाशिवरात्रि । हरेक वर्ष फागुन कृष्ण चतुर्दशी मध्यरातमा परेका दिन मनाइने महाशिवरात्रि पर्व भगवान् शिवको पूजा–आराधना गरी देशभर मनाइँदैछ । पशुपतिनाथसहित देशभरका अरु शिव मन्दिरमा पनि आज बिहानैदेखि दर्शनार्थीको घुइँचो लागेको छ ।

पशुपति क्षेत्रमा साधुसन्त एवम् भक्तजनहरुको भिड लागेको छ । पशुपति परिसर एवम् बाग्मती किनारामा गएरातिदेखि नै दर्शनार्थी एवम् भक्तजनको घुइँचो छ । बिहान २ बजेदेखि नै पशुपतिका चार ढोका खोलिएको पशुपति विकास कोषले जनाएको छ ।

पशुपतिमा शिवरात्रिमा भारतबाट समेत साधुसन्त र तीर्थयात्री आउने गरेका छन् । यस वर्षको महाशिरात्रिमा कम्तीमा २० लाख जना भक्तजनले पशुपतिको दर्शन गर्ने अनुमान गरिएकोछ । पशुपति क्षेत्रमा गाँजा, भाङ, जाँड–रक्सी तथा मासु पूर्णरूपमा निषेध गरिएको छ ।

आज पशुपति पुग्ने भक्तजनका लागि एम्बुलेन्स सेवा, झन्डै छ सय जना स्वयंसेवक, ७० वटा स्वास्थ्य शिविर, नेपाल प्रहरी, सशस्त्र प्रहरी बल तथा राष्ट्रिय अनुसन्धान विभागका सुरक्षा अधिकारी परिचालन हुनेछन् ।
यस्तै सप्तरीको सदरमुकाम राजविराज स्थित हरिनन्देश्वर महादेव मन्दिरका साथै विभिन्न महादेव मन्दिरहरुमा बिहानैदेखि भक्तजनहरुकाे भिड लागेको छ । सप्तरीको महादेवा गाउपालिका स्थित महादेव मन्दिर , छिन्नमस्ता गाउपालिका वडा न.१ बरहि बिरपुरकाे महादेव मन्दिर ,लालापटिकाे लालेश्वरनाथ मन्दिर लगायतका महादेव मन्दिरहरुमा भक्तजनहरुकाे ठुलाे भिड लागेको छ ।

प्रकाशित मिति: २०२४-०३-०८ , समय : १०:२२:५७ , ९ महिना अगाडि