सप्तरीमा चाेरीका माेटरसाइकल सहित दुई जना युवक पेस्तोल र गाँजासहित पक्राउ 

गामघर डेस्क

राजविराज । सप्तरी सदरमुकाम राजविराजमा मोटरसाइकल चोरी गर्ने दुई जना युवक समातिएका छन् । पक्राउ पर्नेमा सप्‍तरीको महदेवा गाउपालिका वडा न. १ ढिकली घर भई हाल राजविराज नगरपालिका वडा न.१ राजदेवी टोल बस्ने २६ बर्षका सुमित कुमार मण्डल र भारतको बिहार राज्य अन्तर्गत मधुवनी ग्राम पन्चायत फुलपरास विसनपुर सिसवा वरही वडा नं. ५ बस्ने २७ बर्षका रणवीर कुमार यादव रहेका छन् ।

सुमित लोड गरिएको कटुवा पेस्तोल र रणबीर लागू औषध गाँजासहित समातिएको जिल्ला प्रहरी कार्यालय सप्तरीले जनाएको छ ।

गएराति सप्तरीको राजविराज नगरपालिका वडा न. ६ स्थित सानिमा बैंक अगाडीबाट पार्किङ गरी राखेको प्र. २-०१-००१ प ८६१४ नम्बरको १६० सिसिको अपाचे मोटरसाईकल चोरी भएको थियो । चोरीमा संलग्न व्यक्तिहरुलाई खोजतलास एवं प्राबिधिक अनुसन्धान गर्ने सिलसिलामा सप्तरीको राजविराज नगरपालिका वडा न. ६ पुरानो बस पार्कबाट प्रदेश ०६-००१ प ०७५७ नम्बरको मोटरसाईकलमा आउदै गरेका मण्डल समातिएकाे जिल्ला प्रहरी कार्यालय सप्तरीका प्रबक्ता एवं डीएसपी ढुन्डीराज नेउपानेले बताउनुभयो । उनको शरीर तलासी लिँदा निजले लगाएको ज्याकेटको खल्तीमा लोड गरिएको अबस्थामा कटुवा पेस्तोल थान-१ र ऐ.मा लाग्ने  ८ एमएम लेखिएको गोली थान-१ फेला परेको उहाँले जानकारी दिनुभयो ।

पेस्तोल र गोली बरामद गरी नियन्त्रणमा लिई प्रारम्भिक सोधपुछ गर्दा निजले मोटरसाईकल आफुसहित रनबीर मिलेर चोरी गरेको र भारतमा लगी बेचेको बताएको नेउपानेले जानकारी दिनुभयो ।

उनको ब्यानका आधारमा यादवको खोजतलास गर्दा उनलाई BR 32 AT 0139 नम्बरको मोटरसाईकलमा पछाडी भारतमै बस्ने विभस यादवलाई बसाई आउदै गरेको अबस्थामा पक्राउ गरिएको प्रहरीले जनाएको छ ।

पक्राउ परेकाहरुको शरीर तलासी लिँदा मोटरसाईकलमा पछाडी बसेका विभस यादवको साथबाट लागु औषध गाँजा ६०२ ग्राम फेला परेको प्रहरीको भनाई छ ।

यता पक्राउ परेकाहरू विरुद्ध हातहतियार खरखजाना, लागूऔषध र चोरी सम्बन्धी मुद्दामा मा थप अनुसन्धान भईरहेको सप्तरी प्रहरीले जनाएको छ ।

प्रकाशित मिति: २०२४-०१-३० , समय : १५:१४:०६ , 1 year अगाडि