मेक्सिकोमा अपहरणमा परेका चार अमेरिकी नागरिकमध्ये दुई जनाको हत्या

गामघर डेस्क

काठमाण्डौ । मेक्सिकोमा अपहरणमा परेका चार जना अमेरिकी नागरिकमध्ये दुई जनाको हत्या भएको छ ।

अमेरिका र मेक्सिकोका अधिकारीका अनुसार दुई जनाको भने सकुशल उद्धार गरिएको छ ।

गएको मार्च ३ तारिखमा बन्दुकधारी समूहले चार जना अमेरिकी नागरिकको अपहरण गरेका थिए ।

टेक्सासको सीमा पारी मेक्सिकोको उत्तर पूर्वी राज्य तमाउलिपासको माटामोरोस शहरबाट उनीहरु अपहरणमा परेका थिए ।

उनीहरुका आफन्तका अनुसार उनीहरु कस्मेटिक सर्जरीका लागि त्यहाँ गएका थिए । उद्धार गरिएका दुई जनाको अमेरिकीको अस्पतालमा उपचार भइरहेको छ ।

प्रहरीले घटनामा संलग्न रहेको आशंकामा २४ वर्षीय एक व्यक्तिलाई पक्राउ गरेको छ । यता साे घटनाप्रति अमेरिका र मेक्सिको सरकारले दुख व्यक्त गरेका छन् । एजेन्सीबाट

प्रकाशित मिति: २०२३-०३-०८ , समय : १०:५१:३८ , २ वर्ष अगाडि