चिसोकाे कहर : तराईमा बाक्लो हुस्सु र कुहिरो यथावत् , जनजिवन कष्टकर बन्दै

गामघर डेस्क

राजविराज । आज पनि उच्च पहाडी र हिमाली भेगका धेरै ठाउँमा हिउँ पर्ने भएको छ । कोशी, गण्डकी, कर्णाली तथा सुदूरपश्चिम प्रदेशका उच्च पहाडी तथा हिमाली भूभागमा हल्का हिमपात हुने मौसम पूर्वानुमान महाशाखाले जनाएको छ । महाशाखाका अनुसार पहाड र उपत्यकामा आज पनि आंशिक बदली हुनेछ ।

हिजोअस्ति जस्तै तराई, मधेशमा बाक्लो हुस्सु र कुहिरो लागिरहेको छ । मौसमविद् गोविन्द झाका अनुसार तराईमा हुस्सु कुहिरोसँगै घाम पनि लाग्ने गरेकोले शीतलहरको अवस्था भने छैन । मौसमविदले शीतलहर नभने पनि तराई मधेशमा शीत र चिसोले जनजीवन कष्टकर बन्दै गएको छ ।

चिसो बढेकाले घरबाहिर निस्कन समेत गाह्रो हुने गरेको स्थानीयबासिन्दाले बताएका छन् । देशका अरु ठाउँमा पनि चिसो बढेको छ । काठमाण्डौको आज बिहानको न्यूनतम तापक्रम ४ दशमलव ५ डिग्री सेल्सियस रहेको छ। यता सप्तरी सहित तराई मधेशका जिल्लाहरुमा बढेको अत्यधिक चिसाे तथा शितलहरले जनजिवन निकै कष्टकर बन्दै गएको छ । चिसाेका कारणले महिला ,बालबालिका तथा बृद्ध बृद्धाहरु बढी प्रभावित भएका छन ।

प्रकाशित मिति: २०२४-०१-२० , समय : ०९:२६:२३ , 1 year अगाडि