त्रिशूली नदीमा खसेको भारतीय नम्बर प्लेटकाे जीप फेला ,जीपमा सवारहरुकाे खाेजि कार्य जारी

गामघर डेस्क

काठमाडौं ।
त्रिशूलीमा खसेको जीप भेटिएको छ । भारतीय नम्बरप्लेटको जीप त्रिशूली नदीमा खसेको थियो । नारायणगढ–मुग्लिन सडकखण्डअन्तर्गत इच्छाकामना गाउँपालिका–५ स्थित तीन नम्बर पुल नजिकबाट उक्त जीप त्रिशूलीमा खसेको हो ।

आज बिहान पौने पाँच बजेको समयमा जीप त्रिशूलीमा खसेको जिल्ला प्रहरी कार्यालयका प्रहरी नायव उपरीक्षक श्रीराम भण्डारीले जानकारी दिए । जीप सडकबाट करिब ८५ मिटर तल खसेको थियो ।

त्रिशूली नदीमा जीप खसेको सूचना पाएपछि विपद् व्यवस्थापन तालिम शिक्षालय कुरीनटारको गोताखोरको टोली परिचालन गरिएको थियो । स्थानीयले जीप नदीमा खसेको खबर गरेपछि उक्त टोली घटनास्थलमा परिचालन भएको थियो ।

केहीबेरअघि गोताखोरको टोलीले जीप पानीभित्र भेट्टाएको प्रहरी नायव उपरीक्षक भण्डारीले जानकारी दिए । उक्त जीपमा कति यात्रु सवार थिए भन्ने यकिन हुन नसकेको उनकाे भनाइ छ। नयाँ पत्रिकाबाट

प्रकाशित मिति: २०२४-०१-१६ , समय : ०९:३०:५५ , 1 year अगाडि